ރާއްޖެ ސަރަހައްދުގައި ގަވައިދާ ހިލާފަށް މަސް ބާނަން އުޅުނު ބޯޓެއް ހިފަހައްޓައިފި

ރާއްޖޭގެ އިގްތިސޯދީ ކަނޑުގެ ސަރަހައްދުގައި ގަވާއިދާ ހިލާފަށް މަސްވެރިކަން ކުރަމުންދިޔަ ބޯޓެއް އެމްއެންޑީއެފްއިން ހިފަހައްޓައިފި އެވެ.

އެ ބޯޓު ކޯސްޓުގާޑުގެ ބެލުމުގެ ދަށަށް ގެންގޮސްފައިވަނީ އިއްޔެ ކަމަށް އެމްއެންޑީއެފް އިން މައުލޫމާތު ދެއެވެ. ކޯސްޓުގާދުގެ ބެލުމުގެ ދަށަށް މި ބޯޓު ގެންގޮސްފައިވަނީ އެމްއެންޑީއެފް ސެންޓްރަލް އޭރިއާ ކޯސްޓްގާޑް ސްކޮޑްރަންގެ ފާސްޓް އިންޓެސެޕްޓް ކްރާފްޓް "މާފަތް" ގެ އެހީތެރިކަމާއެކުއެވެ.

އެމްއެންޑީއެފް އިން ބުނެފައިވަނީ ހަ މީހުންނާއެކު މ. އަތޮޅުގެ 37 މޭލު ބޭރުން މަސްވެރިވެރިކަން ކުރަމުން ދިޔަ ބޯޓެއް ކޯސްޓްގާޑުގެ ބެލުމުގެ ދަށަށް ގެނެސްފައިވާ ކަމަށެވެ. ނަމަވެސް އެއީ ކޮން ގައުމެއްގެ ބޯޓެއްކަމެއް ހާމަކޮށްފައެއް ނުވެއެވެ.

އެމްއެންޑީއެފް އިން ބުނެފައިވަނީ އެ ބޯޓު ފެނިގެން ރިޕޯޓުކޮށްފައިވަނީ އެ ސަރަހައްދުގައި މަސްވެރިކަން ކުރަމުންދިޔަ "އަސަރީ" އަދި "އަސުރުމާ 2" ނަމަކަށް ކިޔާ ދޯނިން ކަމަށެވެ.

މި ބޯޓު ރާއްޖޭގެ އިގްތިސޯދީ ކަނޑުގެ ސަރަހައްދުގައި މަސްވެރިކަން ކުރަމުންދިޔަ މައްސަލަ ސަރުކާރުގެ ކަމާ ގުޅުންހުރި އިދާރާތަކާ ގުޅިގެން އަންނަނީ ތަހުޤީޤުކުރަމުންނެވެ.