ކެފޭތަކުގައި ސިގިރޭޓް، ޝީޝާ ބޮވޭގޮތަށް އުސޫލު ބަދަލުކޮށްފި

"ނިއު ނޯމަލްގައި" ކެފޭތަކާއި ރެސްޓޯރެންޓުތަކުގައި ދުންފަތުގެ އިސްތިއުމާލު ކުރެވޭ ގޮތަށް އެޗްޕީއޭއިން ކޮވިޑް-19އާ ގުޅިގެން އެކުލަވާލި ކާބޯތަކެތީގެ ހިދުމަތްދޭ ތަންތަނުގައި އަމަލު ކުރަންވީ ގޮތުގެ އުސޫލު އިސްލާހުކޮށްފިއެވެ.

އެގޮތުން އިސްލާހުކޮށް ނެރުނު އުސޫލުގައި، ކެފޭތަކާއި ރެސްޓޯރެންޓުތަކުގައި ސިނގިރޭޓާއި، ޝީޝާ އަދި އީސިނގިރޭޓު ބުއިން މަނާ ކުރަން އަންގާފައި ނުވެއެވެ.

ކޮވިޑް-19އާ ގުޅިގެން ކާބޯތަކެތީގެ ހިދުމަތްދޭ ތަންތަނުގައި އަމަލު ކުރަންވީ ގޮތުގެ އުސޫލު އެޗްޕީއޭއިން އާންމު ކުރީ މިދިޔަ މަހުގެ 20 ވަނަ ދުވަހުއެވެ. އެ އުސޫލުގައި ވާގޮތުން ކެފޭތަކާއި ރެސްޓޯރެންޓުތަކުގައި ސިނގިރޭޓާއި، ޝީޝާ އަދި އީސިނގިރޭޓު ބުއިމަކީ މަނާ ކަމެކެވެ. ނަމަވެސް، އެ އުސޫލު އިސްލާހުކޮށް، މިދިޔަ މަހުގެ 27 ވަނަ ދުވަހު އަލުން އެ އުސޫލު ވަނީ އާންމުކޮށްފައެވެ.

އެ އުސޫލުގައި އަންގާފައި ވަނީ، ކާބޯތަކެތީގެ ވިޔަފާރިކުރާ ތަންތަނުގައި ދުންފަތުގެ އިސްތިއުމާލުކުރާ އިރު "އެހެން މީހުންނަށް ނުފޯރާ ވަރުގެ ދުރުމިނެއްގައި" ތިބެވޭނެ އިންތިޒާމު ކެފޭތަކާއި ރެސްޓޯރެންޓުތަކުން ހަމަޖައްސަންވާނެ ކަމަށެވެ.