އޭސީސީން ކުރަމުންދާ މަސައްކަތުގެ އޮޑިޓެއް ހެދުމަށް އަންގަން ނިންމައިފި

އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅިފައިވާ މައްސަލަތައް ތަހުގީގު ކުރުމުގައި ކޮމިޝަން އިން ކުރަމުންދާ މަސައްކަތްތަކުގެ އޮޑިޓްއެއް ހެދުމަށް އޮޑިޓަ ޖެނެރަލްއަށް އަންގަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފި އެވެ.

އެމްޑީޕީގެ ޗެއާޕާސަން، ހެންވޭރު ހުޅަނގު ދާއިރާގެ މެންބަރު ހަސަން ލަތީފު ފޮނުއްވި ސިޓީއެއް މަޖިލީހުގެ ރައީސް މުހައްމަދު ނަޝީދު ވަނީ މިނިވަން މުއައްސަސާތަކުގެ ކޮމިޓީއަށް ފޮނުވައިފަ އެވެ.

އެ ސިޓީގައި އެދިފައިވަނީ އޭސީސީއަށް ހުށަހެޅިފައިވާ މައްސަލަތަކުގެ އޮޑިޓްއެއް މަޖިލީހުން ހެދުމަށެވެ. އެގޮތުން ލަތީފްގެ ސިޓީ ދިރާސާ ކުރުމަށް ބޭއްވި ކޮމިޓީގެ ބައްދަލުވުމުގައި ހެންވޭރު ދެކުނު ދާއިރާގެ މެންބަރު ހުސައިން ޝަހީމް ހުށަހެޅުއްވީ ސިޓީގައި ބުނާ ކަންކަން ބަލައި އޮޑިޓްއެއް ހަދަން އޮޑިޓަ ޖެނެރަލްއަށް ފޮނުވުމަށެވެ.

ނަމަވެސް އިނގުރައިދޫ ދާއިރާގެ މެންބަރު ހަސަން އަހުމަދު ހުށައެޅުއްވީ އެސީސީގެ މެންބަރުން ހާޒިރުކޮށް މިނިވަން މުވައްސަސާތަކުގެ ކޮމިޓީން އެކަން ބެލުމަށެވެ. ނަމަވެސް މި ހުށައެޅުމަށް ތާއީދެއް ނުލިބުނެވެ.

ވިލިމާލެ ދާއިރާގެ މެންބަރު އަހުމަދު އުޝާމް ވިދާޅުވީ، ހަސަން ލަތީފް އެދިވަޑައިގެންފައިވާ ކަންކަން ދިރާސާކޮށް އޮޑިޓެއް ހެދުމުގެ ފަންނީ ކަންކަން ކުރެވޭނީ އޮޑިޓަ ޖެނެރަލްއަށް ކަމަށާއި އޮޑިޓަ ޖެނެރަލްގެ އޮޑިޓް މަޖިލީހުގެ ކޮމިޓީއަށް ފޮނުވުން ދެން ކުރިއަށް ދާނެ ގޮތެއް ފަހުން ނިންމުމަށެވެ. އެހެންކަމުން މެންބަރު ހުސެއިންގެ ހުށަހެޅުއްވުމާ އެއް ގޮތަށް އޭސީސީގެ އޮޑިޓެއް ހަދަން އޮޑިޓަ ޖެނެރަލްގެ އޮފީހަށް ފޮނުވަން ފާސްކުރި އެވެ.