ޓޫރިޒަމްގެ ޕޮލިސީ ޑައިރެކްޓަރުވެސް މަގާމުން ވަކިކޮށްފި

ޓޫރިޒަމް މިނިސްޓްރީގެ ސީނިއާ ޕޮލިސީ ޑައިރެކްޓަރު މުހައްމަދު ހައްސާން ވެސް މިއަދު މަގާމުން ވަކިކޮށްފި އެވެ.

"އަވަސް" ނޫހަށް ދެއްވި އިންޓަވިއުއެއްފައި ހައްސާން ވިދާޅުވީ މަގާމުން ވަކި ކުރެއްވި ސަބަބެއް އަންގާފައިނުވާ ކަމަށާއި އަދި އަލީ ވަހީދަށް ކޮށްފައިވާ ތުހުމަތުތަކާ ގުޅުވައިގެން އޭނާއަށް އެއްވެސް ކަމެއް އެނގިފައި ނުވާކަމަށެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި އައްޔަންކުރި ގޮތަށް ސިޔާސީ މަގާމެއްގައި ކުރީގެ ޓޫރިޒަމް މިނިސްޓަރު މޫސާ ޒަމީރާ ވަރަށް ގާތްކޮށް މަސައްކަތް ކުރެއްވުމަށްފަހު ސަރުކާރު ބަދަލުވުމާއެކު ހައްސާން އަމިއްލައަށް މަގާމުން އިސްތިއުފާ ދިނުމުން އޭނާ މިނިސްޓްރީގެ ސީނިއާ ޕޮލިސީ ޑައިރެކްޓަރުގެ ގޮތުގައި އައްޔަން ކުރެއްވީ އަލީ ވަހީދެއެވެ.

އަލީ ވަހީދަށް މަގާމުން އިސްތިއުފާ ދެއްވުމަށް ރައީސް އިބްރާހިމް މުހައްމަދު ސޯލިހު ރޭ އަންގަވާފައި ވީ ނަމަވެސް އިސްތިއުފާ ދެއްވަވާފައި ނުވާތީ ރައީސް ސޯލިހު މިއަދު ވަނީ އަލީ ވަހީދު މަގާމުން ވަކި ކުރައްވާ ވަގުތީ ގޮތުން ޓޫރިޒަމް މިނިސްޓްރީ ހިންގުން އިކޮނޮމިކް މިނިސްޓަރު ފައްޔާޒު އިސްމާއިލްއާ ހަވާލު ކުރައްވާފަ އެވެ.

އަލީ ވަހީދަށް އަމާޒުވި ޖިންސީ ގޯނާގެ ތުހުމަތުތަކަށް އޭނާ މިހާތަނަށް ޖަވާބު ދެއްވާފައެއް ނުވެ އެވެ.