10 ދުވަސްތެރޭ ރާއްޖެ އައީ 904 ފަތުރުވެރިން

ކޮވިޑަށްފަހު ރާއްޖޭގެ ބޯޑަރު ހުޅުވި ފަހުން މިހާތަނަށް ރާއްޖެ އައިސްފައިވަނީ 904 ފަތުރުވެރިން ކަމަށް މޯލްޑިވްސް އިމިގްރޭޝަނުން ބުނެފި އެވެ.

މޯލްޑިވްސް އިމިގްރޭޝަނުން މިދިޔަ 10 ދުވަސްތެރޭ ރާއްޖެ އައި ފަތުރުވެރިންގެ ތަފާސް ހިސާބު އާންމުކޮށްފައި ވާއިރު ގިނައިން ފަތުރުވެރިން އައިސްފައިވަނީ އިނގިރޭސިވިލާތުންނެވެ. ދެން އެންމެ ގިނައިން އައީ އެމެރިކާ މީހުންނެވެ. ތިންވަނާގައި އޮތީ ޖަރުމަނެވެ.

ރާއްޖެއަށް ފަތުރުވެރިން އައި ގައުމުތަކުގެ ތަފާސް ހިސާބު:

• އިނގިރޭސިވިލާތް - 117 ފަތުރުވެރިން
• އެމެރިކާ - 106 ފަތުރުވެރިން
• ޖަރުމަން - 73 ފަތުރުވެރިން
• ސުވިޒަލޭންޑް - 45 ފަތުރުވެރިން
• ރަޝިޔާ - 45 ފަތުރުވެރިން
• ފިލިޕީންސް - 35 ފަތުރުވެރިން
• ޔޫއޭއީ - 31 ފަތުރުވެރިން
• ސުޕެއިން - 31 ފަތުރުވެރިން
• ހަންގޭރީ - 30 ފަތުުރުވެރިން
• މިސްރު - 23 ފަތުރުވެރިން
• އެހެނިހެން ގައުމުތަކުން - 368 ފަތުރުވެރިން

ބޯޑަރު ހުޅުވާލުމާއެކު ގަތަރުގެ ވެރިރަށް ދޯހާ އިން އައި ފްލައިޓުން ރާއްޖެ އައީ 104 ފަތުރުވެރިންނެވެ. މިއީ އަލުން ރާއްޖެ ހުޅުވާލުން ރާއްޖެ އައި ފުރަތަމަ ފަތުރުވެރިންނެވެ.

Tourist arrivals since the border re-opened. pic.twitter.com/K0ZubvgKty

— Maldives Immigration (@ImmigrationMV) July 24, 2020

މިމަހު 10،595 ޓޫރިސްޓުން އަންނާނެ ކަމަށް ގައުމީ ޔުނިވާސިޓީ އިން ހެދި ދިރާސާއަކުން ވަނީ ދައްކާފަ އެވެ. އެ ދިރާސާގައި ބުނެފައިވާ ގޮތުގައި މި އަހަރު ބާކީ އޮތް މަސްތަކުގައި ޖުމްލަ އަންނާނެ ކަމަށް ބެލެވެނީ 450،134 މީހުންނެވެ. ރާއްޖޭގެ ބޯޑަރު ބަންދުކުރީ މާޗް މަހުގެ 27 ވަނަ ދުވަހުއެވެ. އެއަށްފަހު އަލުން ބޯޑަރު ހުޅުވީ ޖުލައި މަހުގެ 15 ވަނަ ދުވަހުއެވެ.