ކުޅުދުއްފުށީގައި 24 ގަޑިއިރު ކަނޑުތެލަގަ އެރުވުމުގެ ފޯރިގަދަ ހަރަކާތެއް

ބޮޑު އީދާއި ގުޅުވައިގެން ކުޅުދުއްފުށީގައި ކައިޓްބޯޑިންގ އިން އިސްނަގައިގެން 24 ގަޑިއިރު ކަނޑުތެލަގަ އެރުވުމުގެ ހަރަކާތެއް ފަށައިފި އެވެ.

"ހަތަރުދަން 1441" ނަމުގައި އިއްޔެ ހަވީރު ފެށި މިހަރަކާތުގައި 40 އަށްވުރެގިނަ ކައިޓު ސާފަރުން ދަނީ ބައިވެރިވަމުންނެވެ. ކުޅުދުއްފުށީ އެއާޕޯޓު ބީޗް ސަރަހައްދުގައި އިއްޔެ ހަވީރު 16:30 ފެށި މިހަރަކާތް މިއަދު ހަވީރު 16:30 ހަމައަށް ކުރިއަށްދާނެ އެވެ.

ކުޅުދުއްފުށީ ކައިޓްބޯޑިންގ އިސް އޮފިޝަލަކު ކޭއޯއަށް މައުލޫމާތު ދެމުން ބުނީ، މިހަރަކާތް 24 ގަޑިއިރަށް ދެމިގެންދާއިރު ހުރިހާ ވަގުތަކުވެސް ސާފަރުން ކަނޑުތެލަގަ އެރުވުމުގައި ހަރަކާތްތެރިވަމުންދާނެ ކަމަށެވެ. އެގޮތުން އިއްޔެ ހަވީރު ފެށިގެން ރޭގަނޑު ދަންވަރާއެކުވެސް ސާފަރުން ދިޔައީ ކަނޑުތެލަގަ އެރުވުމުގައި އެވެ.

މި ހަރަކާތް ބަލާލުމަށް އެ ސަރަހައްދަށް ގިނަ ބަޔަކު ދަނީ ޖަމާވަމުންނެވެ. އޮފިޝަލް ބުނީ މި ހަރަކާތް ކުރިއަށްދާއިރު އެ ސަރަހައްދުގައި ތަފާތުއެކި ކަންތައްތައްވެސް ކުރިއަށްދާނެ ކަމަށެވެ. އެގޮތުން ކަނޑުތެލަގަ ތަޖުރިބާކޮށްލަން ބޭނުންވާ ފަރާތްތަކަށް އެފުރުސަތު ފަހިކޮށްދެވޭތޯ މަސައްކަތްކުރާނެ ކަމަށް އޭނާ ބުންޏެވެ.

ކުޅުދުއްފުށީ ކައިޓް ސާފަރުން ފާހަގަކުރެވިގެންދަނީ މުޅި ރާއްޖޭގައިވެސް ފާހަގަކޮށްލެވޭ ސާފަރުންނެވެ. އެގޮތުން ރާއްޖޭގައި އެންމެ ދުރު ރާސްތާއަކަށް ކަނޑުތެލަގަ ދުއްވައިގެން އެކަމުގެ ރެކޯޑްވެސް އޮތީ ކުޅުދުއްފުށީ ކައިޓް ސާފަރުން އަތުގައެވެ. އެއީ މިދިޔަ އަހަރު "ގަމީސް ވައިދަށަށް" ނަމުގައި ކުރިއަށްގެންދިޔަ އިވެންޓެއްގައި ކުޅުދުއްފުށިން ށ.ފުނަދޫއަށް ކައިޓުގައި ދަތުރުކޮށްގެންނެވެ. އެއީ 35 މޭލެވެ.