"އިތުރު ފުރަބަންދަކަށް ދިއުމަކީ ކުރަން ރަނގަޅު ކަމެއްނޫން"

ކޮވިޑް-19 ފެތުރުން ކޮންޓޯލް ކުރުމަށްޓަކައި ހުރިހާ ބޭފުޅުންގެ އެއްބާރުލުން މުހިއްމު ކަމަށާއި އިތުރު ފުރަބަންދަކަށް ދިއުމަކީ ކުރަން ރަނގަޅު ކަމެއް ނޫންކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ރައީސް މިހެން ވިދާޅުވީ މިއަދު ކުރެއްވި ޓްވީޓެއްގަ އެވެ. އެގޮތުން ކޮވިޑް-19 ޖެހޭ މީހުންގެ އަދަދު އިތުރުވަމުންދާ އިރު ބޭރުތެރޭ އުޅުވާއިރު މާސްކު އަޅުއްވާ އެޗްޕީއޭގެ އެންގުން ތަކަށް އަމަލުކުރުމަށް ވަނީ އެދިވަޑައިގެންފަ އެވެ.

މާލެ ސަރަހައްދުގައި އޮތް ފުރަބަންދުގެ ހާލަތު އުވާލިފަހުން ރެކޯޑް އަދަދަކަށް މީހުން ދަނީ ޕޮޒިޓިވްވަމުންނެވެ. އެގޮތުން އިއްޔެވެސް ވަނީ 215 މީހަކު ވަނީ ޕޮޒިޓިވް ވެފައެވެ.

ކޯވިޑް-19 ޖެހޭ މީހުންގެ ޢަދަދުދަނީ އިތުރުވަމުން. ބަލިފެތުރުން ކޮންޓްރޯލް ކުރުމަށްޓަކައި ބޭރުގައި އުޅުއްވާއިރު މާސްކް އަޅުއްވާ. @HPA_MV ގެ އެންގުންތަކަށް ޢަމަލުކުރައްވާ. ހުރިހާ ބޭފުޅުންގެ އެއްބާރުލެއްވުން ވަރަށް މުހިންމު. އިތުރު ފުރަބަންދަކަށް ދިއުމަކީ ކުރަން ރަގަޅު ކަމެއްނޫން.

— Ibrahim Mohamed Solih (@ibusolih) August 3, 2020

މިދިޔަ މެއި މަހު ރައީސް ގައުމާ މުހާތަބު ކުަރައްވާ ދެއްކެވި ވާހަކަފުޅެއްަގައި ފުރަބަންދު މުައްދަތު ހަމަވުމުން ލުއިތައް ދިން ނަމަވެސް ބަލީގެ ހާލަތު އިތުރަށް ގޯސްވާނަމަ އަނބުރާ ފުރަބަންދަށް ދާންޖެހުމަކީ އެކަށީގެންވާކަމެއް ވަނީ ވިދާޅުވެފައެވެ.

އަދި ފުރަބަންދު އުވާލިފަހުން ރާއްޖޭގައި ކޮވިޑް ހާލަތު ގޯސްވަމުން ދާއިރު އެކަމަށް އެއްވެސް ފިޔަވަޅެއް އަޅަމުން ނުދާތީ ސަރުކާރަށް ދަނީ ގިނަ ފާޑުކިއުންތަކެއް އަމާޒުވަމުންނެވެ.

ހާއްސަކޮށް ކުރިއަށް މިއޮތް ދެ މަހަކީ ކޮވިޑްގެ ހާލަތު އިތުރަށް ގޯސްވާނެ 2 މަސްކަމަށް ވަނީ ލަފާކޮށްފައެވެ.