އިތުރު ދެ ރިސޯޓު ކަރަންޓީނު ފެސިލިޓީއެއްގެ ގޮތުގައި ބޭނުން ކުރަން ފަށައިފި

މ. އަތޮޅު މެދުފުށި ރިސޯޓާއި ފ. އަތޮޅު ފިލިތެޔޮ ރިސޯޓް ކަރަންޓީން ފެސިލިޓީގެ ގޮތުގައި ހަމަޖައްސައި ބޭނުން ކުރަން ފަށައިފި އެވެ.

މި ދެ ރިސޯޓުގެ އިތުރުން ކުރިން ކަރަންޓީން ފެސިލިޓީގެ ގޮތުގައި ބޭނުން ކުރަމުން އައި

ބަނޑޮހާއި އެރިޔަދޫ އާއި ފަން އައިލެންޑް ރިސޯޓު އަދި ރޯޔަލް އައިލެންޑް ރިސޯޓް އަދިވެސް ދަނީ ކަރަންޓީން ފެސިލިޓީގެ ގޮތުގައި ބޭނުން ކުރަމުންނެވެ.

ރިސޯޓްތަކުގެ ކަރަންޓީންގައި ބައިތިއްބާ ކޮންމެ މީހަކަށް ދުވާލަކު 750ރ. ސަރުކާރުން ހަރަދު ކުރެ އެވެ.

އެ ދެރަށް ކަރަންޓީނު ފެސިލިޓީޒްގެ ގޮތުގައި ހަމަޖެއްސި އިރު ގިނަ އަދަދަކަށް މީހުން ކޮވިޑަށް ޕޮޒިޓިވްވެ ރާއްޖޭގައި ކޮވިޑް ބަލި ޖެހުނު މީހުންގެ އަދަދު ވަނީ 4,293 އަށް އުފުލިފަ އެވެ.

މިދިއަ 24 ގަޑި އިރުގެ ތެރޭގައި ރާއްޖެއިން ކޮވިޑް ބައްޔަށް އިތުރު 129 މީހުން ޕޮޒިޓިވެފައި ވެއެވެ. އޭގެ ތެރެއިން 93 މީހުންނަކީ ދިވެހިންނެވެ.

އޭގެ ކުރީ ދުވަހު ވެސް 215 މީހަކަށް ރާއްޖޭގައި ކޮވިޑް ބަލި ޖެހުނެވެ. މިއީ ރާއްޖޭގައި ކޮވިޑް ފެތުރެން ފެށިފަހުން މިހާ ގިނަ އަދަދެއްގެ ބަޔަކު މި ބައްޔަށް ޕޮޒިޓިވްވި ފުރަތަމަ ފަހަރެވެ.