ހުރިހާ ނަމާދެއްގައި ގުނޫތު ކިޔަނީ

ކޮވިޑް-19ގެ ބަލިމަޑުކަން އިތުރަށް ގޯސްވާން ފެށުމާއެކު އެ ބަލިމަޑުކަމުން ސަލާމަތް ކޮށް ދެއްވުން އެދި ރާއްޖޭގެ ހުރިހާ ރަށެއްގައި ފަރުޟު ނަމާދުތަކުގައި ގުނޫތު ކިއުމަށް އިސްލާމިކް މިނިސްޓްރީން އަންގައިފި އެވެ.

މީގެ ކުރިންވެސް ރާއްޖޭގެ ހުރިހާ މިސްކިތްތަކެއް ފަރުލު ނަމާދަށްފަހު ގުނޫތު ކިޔާފައި ވެއެވެ. ނަމަވެސް ފަހުން މިސްކިތްތައް ހުޅުވި ފަހުން ގުނޫތު ކިޔުން ވަނީ ހުއްޓާލާފައެވެ. އެގޮތުން ރޭ މަގްރިބް ނަމާދުން ފެށިގެން ގުނޫތު ކިއުމަށް ވަނީ އަންގާފަ އެވެ.

ގުނޫތަކީ ބޮޑު ކާރިސާއެއް ކުރިމަތިވުމުން ނަމާދުގެ ފަހު ރަކްއަތުގައި ކިޔާ ހާއްސަ ގުނޫތު (ދުއާ) އެކެވެ. މާތް ރަސޫލާގެ ދުވަސްވަރުވެސް ބޮޑެތި ކާރިސާތައް ދިމާވުމުން ނަމާދުގެ ތެރޭގައި ގުނޫތު ނާޒިލާ ކިޔުއްވިއެވެ.

ލޮކްޑައުންއަށް ލުއިދިން ފަހުން ކޮންމެ ދުވަހު ރެކޯޑް އަދަދަކަށް އެ ބައްޔަށް މީހުން ދަނީ ޕޮޒިޓިވްވަމުންނެވެ. އެކަމާއި ގުޅިގެން މިހާރު ދީފައިވާ ލުއިތަކަށް ބަދަލު ގެނެސް، ފިޔަވަޅުތައް ހަރުކަށި ކުރުމުގެ މަސައްކަތް ވަނީ ފަށާފައެވެ.