އިދާރާތަކުގެ މުސާރައާއި އިނާޔަތްތައް ޝާއިއު ކުރަން އަންގައިފި

ދައުލަތުގެ އިދާރާތަކުގެ މުސާރައާ އިނާޔަތްތައް އެންމެނަށް އެނގޭނެ ހެން އެ އިދާރާއެއްގެ ވެބްސައިޓްގައި ޝާއިއު ކުރަން އިންފޯމޭޝަން ކޮމިޝަނަރުގެ އޮފީހުން އަންގައިފި އެވެ.

ކޮމިޝަނާ ހުސައިން ފިޔާޒު މޫސާ ސޮއި ކުރައްވާ ދައުލަތުގެ ހުރިހާ އިދާރާއަކަށް ފޮނުވި ސިޓީއެއްގައި ބުނެފައިވަނީ ފަހަކަށް އައިސް މުވައްޒަފުންގެ މުސާރަ އާއި އިނާޔަތްތައް ހޯދަން ބައެއް އިދާރާތަކަށް ހުށަހަޅަމުން ގެންދާކަން ފާހަގަ ކުރެވޭތީ އާއި، އެ ފަދަ މައުލޫމާތަކީ، މަޢުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހާމަކުރަން ޖެހޭ މައުލޫމާތެއް ކަމުން މުވައްޒަފުންނަށް ދޭ އުޖޫރަ އާއި އިނާޔަތް، ވަކިވަކިން އަހަރަކު އެއް ފަހަރު ނުވަތަ އެ އިދާރާއަކުން ކަނޑައަޅާ އެއަށް ވުރެ އަވަސް މުއްދަތެއްގައި އަމިއްލައަށް އިސްވެ ޝާއިއު ކުރަން ޖެހޭނެ ކަމަށެވެ.

އަދި ދައުލަތުގެ ހުރިހާ އިދާރާއަކުން ވެސް، މުވައްޒަފުންގެ މުސާރަ އާއި އިނާޔަތްތައް ވަކިވަކިން އެނގޭނެ ގޮތަށް އެ އިދާރާއެއްގެ ވެބްސައިޓުގައި ޝާއިއު ކުރަން އަންގާ ކަމަށެވެ.