ބެލްގޮރޯޑް ސްޓޭޓް ޔުނިވާސިޓީިން އެވިޑް ކޮލެޖާއެކު ޕާރޓްނަރޝިޕް އެމްއޯޔޫއެއްގައި ސޮއިކޮށްފި

ރަޝިޔާގެ ސްޓޭޓް ޔުނިވަރސިޓީއެއްކަމުގައިވާ ބެލްގޮރޯޑް ސްޓޭޓް ޓެކްނޮލޮޖިކަލް ޔުނިވަރސިޓީއިން އެވިޑް ކޮލެޖާއިއެކު ޕާރޓްނަރޝިޕް އެމްއޯޔޫއެއްގައި ސޮއިކޮށްފިއެވެ.

އެވިޑް ކޮލެޖްގެ ބިޒްނަސް ޑިވެލޮޕްމެންޓްގެ އެގްޒެކެޓިވް ޑިރެކްޓަރ ޢަލީ ރަޝީދު ވިދާޅުވިގޮތުގައި މި އެމްއޯޔޫގައި ސޮއިކުރެވުމާއެކު ގިނަކަންތައްތަކެއް ދެފަރާތްގުޅިގެން ކުރިއަށް ގެންދިއުމަށް ހަމަޖެހިފައިވެއެވެ.

އެވިޑް ކޮލެޖުން އެމް.އޯ.ޔޫގައި ސޮއިކުރެއްވީ ޗެއަރމަން ޢަބްދުﷲ މުސްތާޤް ރަޝާދުއެވެ. ބެލްގޮރޯޑް ސްޓޭޓް ޔުނިވަރސިޓީއިން ސޮއިކުރެއްވީ ޗާންސެލަރ/ރެކްޓަރ ޕްރޮފެސަރ ސާޖޭ ނިކޮލަވިޗް ގްލެގޮލޭ އެވެ.

މި އެމްއޯޔޫގައި ސޮއިކުރެވުނީ އޮންލައިކޮށް ޒޫމް މެދުވެރިކޮށް މިއަދު ބޭއްވި ރަސްމިއްޔާތެއްގައެވެ. މިރަސްމިއްޔާތުގައި ބެލްގޮރޯޑް ޔުނިވަރސިޓީގެ އިސްވެރިންނާއި އެވިޑް ކޮލެޖްގެ އިސްވެރިން ބައިވެރިވެލެއްވެވިއެވެ. އެމްއޯޔޫގައި ސޮއިކުރެއްވުމަށްފަހު ވާހަކަފުޅު ދައްކަވަމުން އެވިޑް ކޮލެޖްގެ ޗެއަރމަން ޢަބްދުﷲ މުސްތާޤް ރަޝާދު ވިދާޅުވީ މިކަމަކީ އެވިޑް ކޮލެޖްގެ ތާރީހްގައި ލިޔެވުނު އާސަފްހާއެއްކަމުގައެވެ.

އެގޮތުން ބެލްގޮރޯޑް ސްޓޭޓް ޓެކްނޮލޮޖިކަލް ޔުނިވަރސިޓީގެ ޑިގްރީ އަދި މާސްޓަރސް ޕްރޮގްރާމްތައް އެވިޑް ކޮލެޖުން ހިންގުމާއި، ދެފަރާތުގެ ދަރިވަރުންނާއި ސްޓާފުންގެ އެކްސްޗޭންޖް ޕްރޮގްރާމްތައް ހިންގުމާއި ދެފަރާތް ގުޅިގެން ރާއްޖެއަށް ބޭނުންވާ ދާއިރާތަކުން ދިރާސާކުރުމާއި، ޝާއިރުކުރުމާއި، ސެމިނަރ، ކޮންފަރެންސް ބޭއްވުމާއި އަދި އީޖާދީ ޕްރޮޖެކްޓްތައް ހިންގުމަށް ރޭވިފައިވެއެވެ.

މީގެ އިތުރުން ބެލްގޮރޯޑް ސްޓޭޓް ޓެކްނޮލޮޖިކަލް ޔުނިވަރސިޓީގެ ފުރިހަމަ އެހީތެރިކަމާއެކު އެވިޑްކޮލެޖުގައި އިންޖިނިއަރިންގ ފެކަލްޓީއެއް ގާއިމުކުރެވިގެން ދާނެއެވެ. ބެލްގޮރޯޑް ސްޓޭޓް ޓެކްނޮލޮޖިކަލް ޔުނިވަރސިޓީއަކީ ކޮންސްޓްރަކްޝަން އިންޖިނިއަރިންގ ދާއިރާއިން ރަޝިޔާއިން އެންމެ ފާހަގަކޮށްލެވޭ އެއް ޔުނިވަރސިޓީއެވެ. އެޔުނިވަރސިޓީގެ ފަންނީ މާހިރުންގެ އެހީތެރިކަމާއި ވަސީލަތްތަކުގެ އެހީގައި ރާއްޖޭގައި ސިވިލް އިންޖިނިއަރިންގ އަދި އާކިޓެކްޗަރ ދާއިރާއިން ފުރަތަމަ ޑިގްރީ އަދި މާސްޓަރސް ޑިގްރީއަށް ކިޔެވުމުގެ ފުރުސަތު ފަހިވެގެންދާނެއެވެ. އަދި މީގެއިތުރުން މިޔުނިވަރސިޓީގެ އެހީތެރިކަމާއެކު ގދ. ތިނަދޫގައި އެވިޑްކޮލެޖުގެ އިންޖިނިއަރިންގ ދާއިރާއަށް ހާއްސަ ކެމްޕަސްއެއް އިމާރާތްކުރުމަށް ރޭވިފައިވެއެވެ.

އެވިޑް ކޮލެޖްގައި ދެހާހަށްވުރެ ގިނަ ދަރިވަރުން ތަފާތު ކޯސްތަކުގައި ކިޔަވަމުންގެންދެއެވެ.