އެއްގަމު އުޅަނދު އިންޝުއަރެންސް ކުރަން ނުޖެހޭ ގޮތަށް ގާނޫނަށް އިސްލާހެއް ހުށައަޅައިފި

އެއްގަމު އުޅަނދު އިންޝުއަރެންސް ކުރަން ނުޖެހޭ ގޮތަށް އެއްގަމު އުޅަނދު ދަތުރުފަތުރާ ބެހޭ ގާނޫނަށް އިސްލާހު ހުށަހަޅައިފި އެވެ.

އެއްގަމު އުޅަނދު ދަތުރުފަތުރާ ބެހޭ ގާނޫނު މިހާރު އޮތް ގޮތުން، ރާއްޖޭގައި އެއްގަމު އުޅަނދު ދުއްވަން ވާނީ، ތާޑް ޕާޓީއަކުން އިންސުއެރެންސް ކޮށްފައިވާ ކަމަށް ބަޔާންކޮށްފައިވެ އެވެ.

މި އިސްލާހު ހުށަހެޅުއްވީ ނޮޅިވަރަމް ދާއިރާގެ މެމްބަރު މުހައްމަދު ނަޝީދެ އެވެ. މެންބަރު ނަޝީދު ހުށަހެޅުއްވީ، އެ ގާނޫނުގެ 69 ވަނަ މާއްދާ، އިންސުއަރެންސް ނަގަން ބުނެފައި އޮންނަ މާއްދާ އުވާލުމަށެވެ.

އެއްގަމު އުޅަނދު އިންސުއަރެންސް ކުރަނީ އެ އުޅަނދެއް އެކްސިޑެންޓްވެގެން ގެއްލުން ލިބޭ މީހަކަށް ނުވަަތަ ތަނަކަށް ނުވަތަ އެއްޗަކަށް ލިބޭ ގެއްލުމުގެ ބަދަލު ދިނުމުގެ ގޮތުން ކަމަށް އެ ގާނޫނުގައި ބުނެ އެވެ.

ބިލު ހުށަހެޅި ސަބަބެއްގެ ގޮތުގައި އޭނާ ބުނުފައި ވަނީ، އުޅަނދުތައް އިންޝުއަރެންސް ކުރެވުމުން ދިޔަ ނަމަވެސް، އެކްސިިޑެންޓްތަކުގައި އިންޝުއަރެންސް ލިބެމުން ނުދާ ކަމަށެވެ. އަދި ރައްޔިތުންގެ އަތުން އަހަރަކު އެތައް އެތައް މިލިއަން ރުފިޔާއެއް އިންޝުއަރެންސް ކުންފުނިތަކުން ނަގަމުންދާއިރު އެކަމުގެ ސަބަބުން ސަރުކާރަށް ވެސް އަދި ރައްޔިތުންނަށް ވެސް އެއްވެސް މަންފާއެއް ލިބެމުން ނުދާ ކަމަށް ބިލުގައި ބުނެފައިވެ އެވެ.

އެހެން ކަމުން އެފަދަ ކަމެއް ކުރުމަށް އެ ގާނޫނުން ލާޒިމް ކޮށްފައި އޮތުމަކީ، ބަލައިގަންނަން ދަތި އަދި ރައްޔިތުންނަށް ގެއްލުން ލިބޭ ކަމެއް ކަމަށް ބިލުގައި ބުނެފައިވެ އެވެ.