ހަނިމާދޫ މަގުހެދުމުގެ މަޝްރޫއުގެ 65 ޕަސެންޓް މަސައްކަތް ނިންމާލައިފި

ހދ ހަނިމާދޫ މަގުތައް ޒަމާނީ ފެންވަރަކަށް ހެދުމުގެ މަޝްރޫއުގެ 65 ޕަސެންޓުގެ މަސައްކަތް ނިމިފައިވާ ކަމަށް މި މަސައްކަތް ކުރިއަށް ގެންދާ އެމްޓީސީސީން ބުނެފިއެވެ.

އެގޮތުން ފައިމަގުގައި ހިނގާނެ ސަރަހައްދު ހެދުމުގެ 80 ޕަސެންޓު ނިމިފައިވާއިރު މިހާރު ފެންހިންދާ ނިޒާމުގެ މަސައްކަތް ވަނީ ފަށާފައެވެ.

ހދ. ހަނިމާދޫގެ މަގުތައް ޒަމާނީ ފެންވަރަކަށް ހެދުމުގެ މަޝްރޫޢުގެ %65 މަސައްކަތް ވަނީ ނިމިފައި. މި މަޝްރޫޢުގެ ދަށުން ފައިމަގުގައި ހިނގާނެ ސަރަޙައްދެއް ހެދުމުގެ %80 މަސައްކަތް މިހާރުވަނީ ނިމިފައި. އަދި ކުރިއަށްދަނީ ފެންހިންދާ ނިޒާމެއް ޤާއިމުކުރުމުގެ މަސައްކަތް. pic.twitter.com/D0jlr36EzC

— MTCC Plc (@MTCCPlc) September 3, 2020

މި ޕްރޮޖެކްޓް ތެރޭގައި އުޅަނދު ދުއްވުމަށް މަގުގެ 38،916 އަކަ މީޓަރ ސަރަހައްދެއް ގައި ތާރުއަޅާ އަދި 16،518 އަކަ މީޓަރ ޕޭވްމަންޓް ނިމިގެން ދާނެ ކަމަށެވެ. އަދި މަގު ބަތްތި ދިއްލުމަށް ބޭނުންވާ ނަރު އެޅުމާއި މީގެ އިތުރުން، މަގުބައްތި ހަރުކުރުމާއި، 19،679 އަކަ މީޓަރުގެ ސަރަޙައްދެއްގައި ޓްރެފިކް ނިޝާންތައް ކުރެހުމާއި، ޓްރެފިކް ނިޝާން ހަރުކުރުމަށްވެސް ވަނީ ހަމަޖެހިފައެވެ.

މި މަޝްރޫއުގެ ދަށުން ހަނިމާދޫގެ 18 މަގެއްގައި ތާރުއަޅައިގެން ތަރައްގީކުރުމަށް ވަނީ ހަމަޖެހިފައެވެ. އެމްޓީސީސީ އަށް މި ޕްރޮޖެކްޓު ހަވާލުކޮށްފައިވަނީ 240 ދުވަހުގެ ތެރޭގައި ނިންމުމަށެވެ. މިއީ 46.7 މިލިއަން ރުފިޔާ ހަރަދުކޮށްގެން ހިންގާ މަޝްރޫއެކެވެ.