ގަދަވަޔާއެކު ކުޅުދުއްފުއްޓަށް ގެއްލުންތަކެއް

ރޭ މެންދަމު އުތުރަށް އައި ކޮޅިގަނޑުގައި ކުޅުދުއްފުއްޓަށް ގެއްލުންތަކެއް ލިބިއްޖެ އެވެ. ގާތްގަނޑަށް ރޭ މެންދަމު 2 ކުން ފެށިގެން ފަތިސް ނަމާދާ ހަމައަށް ވަރަށް ބާރަ ވައިޖެހިފައި އެވެ.

އެންމެ ބާރަށް ވައި ޖެހުނީ 2 ކުން ފެށިގެން 3:30 އާ ދެމެދުގައި އެވެ. މިވަގުތުތަކުގައި ކުޅުދުއްފުށީގެ ބައެއް ގެތަކުގެ ފުރާޅު އެއްލާލައި ގަސް ރުއް ވެރިފައި އެވެ.

ކައުންސިލުން މިއަދު ހެނދުނު އާންމުކުރި ލިޔުމެއްގައި ބުނެފައިވަނީ އާދަޔާ ހިލާފަށް ވައިގަދަވެ ރައްޔިތުންގެ މުދަލަށާއި ގެދޮރަށް ގެއްލުންވަމުންދާތީ އެކަން ރިޕޯޓްކުރުމަށް ހޮޓްލައިނެއް ކައުންސިލްގައި ގާއިމުކޮށްފައިވާ ކަމަށެވެ. އެގޮތުން ގެއްލުން ރިޕޯޓްކުރުމަށް ގުޅާނީ 6527102 އަށެވެ.

އާދަޔާ ހިލާފު ބާރަށް ރޭ ދަންވަރާއި މެންދަރު ޖެހުނު ވައިގައި ބައެއް ގެތަކުން ރުއްގަސް ވެއްޓި ގެއްލުންވިއިރުގައި އެތަކެތި ނެގުމަށް އެމްއެންޑީއެފާއި ފަޔަރ މަނުން ހަރަކާތްތެރިވެފައިވެ އެވެ.

މި ކޮޅިގަނޑުގެ އަސަރު ކުޅުދުއްފުށީގެ އިތުރުން އުތުރުގެ ގިނަ ރަށްތަކަކަށް ކޮށްފައިވެ އެވެ.