ކުޅުދުއްފުށީ ކޯޓްގެ މެޖިސްޓްރޭޓް ޝާހިދުގެ މައްސަލައެއް ޖޭއެސްސީން ބަލަނީ

ކުޅުދުއްފުށީ މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަގާމުގައި މިހާރު ހުންނެވި އިބްރާހިމް ޝާހިދުގެ މައްސަލައެއް ބެލުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.

ޖޭއެސްސީން ބުނެފައިވަނީ އެ ކޮމިޝަންގެ މި އަހަރުގެ 63 ވަނަ ބައްދަލުވުމުގައި މެޖިސްޓްރޭޓް ޝާހިދުގެ މައްސަލަ ބެލުމަށް ތަހުގީގު ކޮމިޓީއެއް އެކުލަވާލާފައިވާ ކަމަށެވެ.

އެގޮތުން މައްސަލަ ބެލުމަށް ކޮމިޓީން ނިންމާފައިވަނީ ފަނޑިޔާރެއްގެ މަސްއޫލިޔަތާއި ވާޖިބުތައް އަދާނުކުރާކަމަށް ބެލެވޭތީކަމަށްވެސް ޖޭއެސްސީން ބުނެފައިވެއެވެ. ޝާހިދަކީ ނޮޅިވަރަންފަރަށް ނިސްބަތްވާ ބޭފުޅެކެވެ.

މެޖިސްޓްރޭޓް ޝާހިދުގެ މައްސަލަ ބެލުމަށް ޖޭއެސްސީން ނިންމާފައިވާއިރު މީގެ ކުރިން ހދ އަތޮޅުގެ އިސް މެޖިސްޓްރޭޓްގެ މަގާމުގައި ހުންނެވި މުހައްމަދު މައުސޫމްގެ މައްސަލައެއްވެސް ޖޭއެސްސީން ވަނީ ބަލާފައެވެ.

އެގޮތުން މައުސޫމްގެ ރިޝްވަތު ނެގުމުގެ މައްސަލަތަކާއި ޖިންސީ ގޯނާގެ މައްސަލަތަކެއް އެކޮމިޝަނަށް ސާބިތުވެ، މަގާމުން ވަކިކުރުމަށް ނިންމުމާއި ގުޅިގެން އެބޭފުޅާ ވަނީ މަގާމުން އިސްތިއުފާ ދެއްވާފައެވެ.