ޖަޕާނުން ރާއްޖެއަށް 47.5 މިލިއަން ޑޮލަރުގެ ލޯނު އެހީ

ޖަޕާނު ސަރުކާރުން ރާއްޖެއަށް 47.5 މިލިއަން ޑޮލަރު ލޯނުގެ އެހީއެއް ދީފި އެވެ.

މިއަދު ބޭއްވި ހާއްސަ ރަސްމިއްޔާތެއްގައި ޖަޕާނާއި ރާއްޖެއާއި ދެމެދު ލޯނު އެއްބަސްވުމުގައި ވަނީ ސޮއިކުރައްވާފަ އެވެ. ރާއްޖޭގެ ސަރުކާރުގެ ފަރާތުން އެއްބަސްވުމުގައި ސޮއިކުރައްވާފައިވަނީ ފޮރިން މިނިސްޓަރު އަބްދުﷲ ޝާހިދެވެ. އަދި ޖަޕާނުގެ ފަރާތުން އެއްބަސްވުމުގައި ސޮއިކުރައްވާފައިވަނީ އެގައުމުގެ ފަރާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެއިކޯ ޔަނާއި އެވެ.

Maldives and Japan signs Exchange of Notes for the Covid-19 Crisis Response Emergency Support Loan of 5 Billion Japanese Yen

Press Release:https://t.co/UUqhCgtnw2 pic.twitter.com/gEv0w4Aqfg

— Ministry of Foreign Affairs 🇲🇻 (@MoFAmv) September 28, 2020

ފޮރިން މިނިސްޓަރު ޝާހިދު ވިދާޅުވީ މިއަދު ދިން ލޯނުގެ އެހީއަކީ ޖަޕާނުން މިހާތަނަށް ރާއްޖެއަށް ފޯރުކޮށްދީފައިވާ އެންމެ ބޮޑު ލޯނުގެ އެހީ ކަމަށެވެ. އެ ލޯނު ދައްކައި ނިންމުމަށް 15 އަހަރުގެ މުއްދަތެއް ދީފައިވާއިރު ގްރޭސް ޕީރިއަޑްގެ ގޮތުގައި ހަތަރު އަހަރު ދީފައިވާ ކަމަށް ޝާހިދު ވިދާޅުވިއެވެ. އަދި ލޯނު އެހީއަކީ 0.01 ޕަސެންޓްގެ އިންޓްރެސްޓެއް ނަގާގޮތަށް ދީފައިވާ ލޯނުގެ އެހީއެއް ކަމަށެވެ.

ޝާހިދު ވިދާޅުވީ ކޮވިޑް-19 އާ ގުޅިގެން ދުނިޔޭގެ ހުރިހާ ކަންކޮޅުތަކުންވެސް ވަނީ އިގްތިސޯދީގޮތުން ވަރަށް ބޮޑު ދަތިތަކަކާ ކުރިމަތިލާން ޖެހިފައި ކަމަށެވެ. ނަމަވެސް މި ދަނޑިވަޅުގައިވެސް ޖަޕާނުން އެހާބޮޑު އެހީތެރިކަމެއް ދިނުމަކީ ފާހަގަ ކުރެވޭ ކަމެއް ކަމަށް ޝާހިދު ވިދާޅުވިއެވެ.

އެ ރަސްމިއްޔާތުގައި ވާހަކަދައްކަވަމުން ކެއިކޯ ވިދާޅުވީ މިއަދު ދިން ލޯނަކީ އިމާޖެންސީ ސަޕޯޓް ލޯނެއް ކަމަށާއި އެ ލޯނުގެ ބޭނުމަކީ ގައުމުގެ އިގްތިސޯދު އިތުރަށް ވަރުގަދަކޮށް ތަރައްގީއަށް އެހީއެއް ފޯރުކޮށްދިނުން ކަމަށެވެ.

ޖަޕާނުން ވަނީ ރާއްޖެއަށް ބޮޑެތި އެހީތަކެއް އެކި ރޮނގުތަކުން ފޯރުކޮށްދީފައި ކަމަށް ފޮރިން މިނިސްޓަރު ވިދާޅުވިއެވެ.

އެގޮތުން ޖަޕާނުން ފޯރުކޮށްދޭ އިންސާނީ ތަރައްގީގެ އެތައް ހިދުމަތެއް ވަނީ ދިވެހީން ބޭނުންކޮށްފައި ކަމަށް ޝާހިދު ވިދާޅުވިއެވެ.