ރިސޯޓު މުވައްޒަފުން ޗުއްޓީއަށް ދާއިރު ކަރަންޓީނަށް 14 ދުވަސް ދޭން އެދެފި

ރިސޯޓުތަކުގެ މުވައްޒަފުން ޗުއްޓީއަށް ރަށައް ދާއިރު ކަރަންޓީނަށް ވަކިން 14 ދުވަސް ދޭން އެދެފިއެވެ.

އާންމު ސިއްހަތުގެ ގާނޫނު ބުނާގޮތުން ކޮވިޑް-19އިގެ ސަބަބުން ކަރަންޓީނުގައި ތިބެންޖެހޭ މީހުންނަށް ހާއްސަ ޗުއްޓީއެއް ހަމަޖައްސަން ޖެހޭނެ އެވެ.

ރޭ ހެލްތު އިމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުުވުމުގައި ޓޫރިޒަމް މިނިސްޓްރީގެ ޑެޕިޔުޓީ މިނިސްޓަރު އައްސަދު ރިޒާ ވަނީ މުވައްޒަފުން އޮފް ދުވަސްތައް އެއްކޮށްގެން ނުވަތަ އަހަރީ ޗުއްޓީގައި ދާއިރު ޗުއްޓީ ދުވަސްތަކުގެ އިތުރަށް އިތުރު 14 ދުވަސް ކަރަންޓީނަށް ދިނުމަށް އިލްތިމާސްކޮށްފަ އެވެ.

ރިސޯޓުތަކުން ރަށްރަށަށް ދާނަމަ 14 ދުވަހުގެ ކަރަންޓީނު ފުރިހަމަ ކުރަންޖެހޭނެެ ކަމަށް އެޗްޕީއެގެ ގައިޑްލައިން ބުނެފައިވެ އެވެ.

އައްސަދު ވަނީ މުވައްޒަފުން މިހާލަތުގައި ވަމުންދާ ގުރުބާނީ ފާހަގަ ކުރައްވާ ޓޫރިޒަމް ކޮޅަށް ޖަހައި އިގްތިސޯދު ދިރުވަން ޓޫރިޒަމް އިންޑަސްޓްރީ އިން ކުރާ މަސައްކަތް ފާހަގަކުރައްވާ ޝުކުރު އަދާކުރައްވައިފަ އެވެ.