ކުޅުދުއްފުށިން ފުރައިގެން ކުރިނބީއަށް ދަތުރުކުރި ދޯންޏެއް ބަންޑުން ޖަހާލައިފި

ކުޅުދުއްފުށިން ފުރައިގެން ހދ.ކުރިނބީއަށް މުދާ ބަރުކޮށްގެން ދިޔަ ދޯންޏެއް ބަންޑުން ޖަހާލައިފިއެވެ.

އެދޯނި ބަންޑުން ޖަހާލާފައިވަނީ ކުނބުރުދޫއާއި، ކުރިނބީއާ ދެމެދު ކަނޑުތެރެއަށެވެ. ބަނޑުންޖަހާލި ކުރިނބީ ދޯނީގައި ދަތުރުކޮށްފައިވަނީ އަންހެނަކާއި ދެ ފިރިހެނުންނެވެ. ކުރިނބީ ކައުންސިލުން ބައެއް މީޑިއާތަކަށް މައުލޫމާތު ދިން ގޮތުގައި ދޯނިން ދަތުރުކުރި އެންމެންގެ ހާލުވެސް ރަނގަޅުކަމަށެވެ.

ހާދިސާގެ މައުލޫމާތު ކުރިނބީ ކައުންސިލަށް ލިބިފައިވާ ކަމަށާއި މިހާރު އެމްއެންޑީއެފްގެ ކޯސްޓް ގާޑާއި މި މައުލޫމާތު ވަނީ ހިއްސާ ކުރައްވާފައިވާނެ ކަމަށްވެސް އެ ކައުސިލުން މީޑިއާތަކަށް މައުލޫމާތުދީފައިވެ އެވެ. އަދި ބަންޑުން ޖަހާލާފައިވާ ދޯންޏަށް އެހީތެރިކަން ދިނުމަށް އެ ސަރަހައްދަށްވަނީ އިތުރު ދޯންޏެއް ގޮސްފައެވެ.

ކައުންސިލުން ބުނީ ދޯނި ބަންޑުން ޖަހާލީ ދިޔަވެގެން ގޮސްކަމަށާއި، މޫސުން ގޯސް ނޫންކަމަށެވެ. ދޯނިން ދަތުރުކުރި އެއްވެސް މީހަކަށް ގެއްލުންނުވި ނަމަވެސް ދޯނީގައި ހުރި ހުރިހާ މުދާތައް ހެން ވަނީ ކަނޑުއަޑިއަށް ގޮސްފަ ކަމަށެވެ.