އަންނަ އަހަރު މަހަށް އިތުރު މާރުކެޓުތައް ހޯދުމުގެ މަސައްކަތް ފުޅާ ކުރައްވާނެކަމަށް ޒަހާ ވިދާޅުވެއްޖެ

ފެށޭ އަހަރު ތެރޭ ރާއްޖޭގެ މަސްވެރިކަން ދުނިޔެއަށް އިޝްތިހާރުކޮށް، ދިވެހިން ބާނާ މަހަށް އިތުރު މާރުކެޓުތައް ހޯދުމުގެ މަސައްކަތް ފުޅާ ކުރައްވާނެކަމަށް ފިޝަރީޒް މިނިސްޓަރ ޒަހާ ވަހީދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.

ރާއްޖެއިން އެކްސްޕޯޓްކުރާ މަހުގެ ބޮޑު އިންސައްތަ އެކްސްޕޯޓުކުރަނީ ޔޫރަޕަށެވެ. ނަމަވެސް އެންމެކުޑަކޮށް ތަރައްގީވެފައިވާ ގައުމަކުގެ ލިސްޓުން، ތަރައްގީވަމުން އަންނަ ގައުމަކުގެ ލިސްޓަށް ރާއްޖެ އަރާފައިވާތީ، ރާއްޖެއިން ޔޫރަޕުގެ ގައުމުތަކަށް އެކްސްޕޯޓުކުރާ މަހުގެ ބާވަތްތަކަށް ލިބެމުންއައި ޑިއުޓީގެ އިނާޔަތްވަނީ، 2013 ވަނަ އަހަރުގެ ޑިސެމްބަރުމަހުން ފެށިގެން ކަނޑާލާފައެވެ.

އޭގެސަބަބުން ރާއްޖެއިން ޔޫރަޕަށް މަސް އެކްސްޕޯޓުކުރުމުން ލިބެމުންދިޔަ ފައިދާ ވަރަށްބޮޑަށް ދަށްވެފައިވެއެވެ. ރާއްޖެއިން މަސް އެކްސްޕޯޓުކުރާނެ އިތުރު މަރކެޓުތައް ހޯދުމުގެ މަސައްކަތް ކުރަމުންދިޔަ ނަމަވެސް، އެކަށީގެންވާ ކުރިއެރުންތަކެއް އަދި ވަނީ ނުލިބެއެވެ.

މެމްބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ޒަހާ ވިދާޅުވީ މަސްވެރިކަމުގެ ސިނާއަތުގައި މަސައްކަތްކުރާ ފަރާތްތަކާއި ގުޅިގެން ދުނިޔޭގެ އިތުރު ބާޒާރުތަކަށް ވަނުމަށް މަސައްކަތްކުރާނެ ކަމަށެވެ.

މިނިސްޓަރު ވިދާޅުވީ އަންނަ އަހަރު މާކެޓިންގެ ހަރަކާތްތައް އިތުރު ހަރުފަތަކަށް ގެންދާނެ ކަމަށާއި މާރކެޓިންގެ މަސައްކަތް ވަރަށް ބޮޑަށް ކުރަންޖެހޭ ކަމަށެވެ. އަދި މިމަސައްކަތުގައި އެމްއެސްޕީއާއި އިންޑަސްޓްރީގައި ތިބި ފަރާތްތަކާއި ގުޅިގެން މަސައްކަތްތަކެއްކޮށް އިތުރު ބާޒާރުތަކަށް ވަނުމަށް މަސައްކަތްކުރާނެ ކަމަށެވެ.