ހާރިޖީ ގުޅުން ތަކުގެ ސަބަބުން މިނިވަންކަން ގެއްލުނަކަ ނުދޭނަން: ރައީސް

ބޭރު ގައުމުތަކާ ގުޅުން ބަދަހި ކުރުމުގެ ތެރެއިން ރާއްޖޭގެ މިނިވަންކަމާއި ސިޔާދަތު ފުރިހަމައަށް ރައްކާތެރި ކުރާނެ ކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ދެއްވައިފި އެވެ.

ގައުމީ ދުވަހުގެ މުނާސަބަތުގައި ދިވެހި ގައުމާ މުހާތަބުކުރައްވައި ރައީސުލްޖުމްހޫރިއްޔާ ވިދާޅުވީ ރާއްޖޭގެ ގައުމިއްޔަތުގެ އެންމެ މަތިވެރި ސިފައަކީ، މިނިވަން މުސްތަޤިއްލު ގައުމެއްގެ ގޮތުގައި، ބައިނަލްއަގުވާމީ މުޖްތަމައަށް ނޭވާލުމުގެ މަތިވެރި ނިއުމަތް ލިބިފައިވުންކަމަށެވެ.

ރައީސް ވިދާޅުވި ގޮތުގައި ހުރިހާ ގައުމުތަކަކާއެކުވެސް، ހާރިޖީ ގުޅުންތައް ސަރުކާރުން ހަރުދަނާކުރަމުން އަންނަނީ، ވަރަށް މުހިންމު ދެ ކަމެއް ކަށަވަރުކުރަމުން ކަމަށެވެ.

އެގޮތުން ފުރަތަމަ ކަމަކީ ރާއްޖޭގެ އަމިއްލަ މިނިވަންކަމާއި ސިޔާދަތު ފުރިހަމައަށް ރައްކާތެރިކުރުމާއި ދެވަނަ ކަމަކީ އެ ގުޅުންތަކުގެ ސަބަބުން، ރައްޔިތުންނަށް ފައިދާއާއި ލާބަ ލިބޭނެކަން ކަށަވަރު ކުރުން ކަމަށެވެ.

ހިތާބުގައި އިތުރަށް ރައީސް ވިދާޅުވީ މި ސަރުކާރު ފެށުނުއިރު ރާއްޖެ އޮތީ ބައިނަލްއަގުވާމީ މުޖުތަމައައުން ވަރަށް ބޮޑަށް އެކަހެރި ކުރެވިފައި ކަމަށާއި، އެކަމުގެ ސަބަބުން، ރާއްޖެއަށާއި ދިވެހި ރައްޔިތުންނަށް ލިބެންހުރި، އެތައް މަންފާތަކަކާއި، އެތައް އެހީތަކެއް ލިބުމަށް ވަރަށް ބޮޑަށް ހުރަސްއެޅިފައި އޮތް ކަމަށެވެ.

އެގޮތުން ކޮވިޑް-19ގެ ބަލިމަޑުކަމުން އަރައިގަތުމުގައި، މިހާތަނަށް ރާއްޖެއަށް ހޯދިފައިވާ ކުރިއެރުމާއި، ލިބެމުން އަންނަ ކާމިޔާބީގެ އެއް ސަބަބަކީ، ރާއްޖެ އާއި ބައިނަލްއަގުވާމީ މުޖްތަމައާ ދެމެދު އޮތް ބަދަހި ގުޅުންކަމުގައި ރައީސް ވަނީ ފާހަގަކުރައްވާފައެވެ. އަދި ގައުމުތަކުން ވެދެއްވާ އެހީތެރިކަން ފާހަގަކޮށް ގައުމުތަކަށާއި، ވަކިވަކި ފަރުދުންނަށާއި، ބައިނަލްއަގުވާމީ ޖަމާއަތްތަކަށް، ދިވެހި ރައްޔިތުންގެ ނަމުގައި، ރައީސްވަނީ ޝުކުރު ދަންނަވާފައެވެ.

ދިވެހިންގެ ގައުމީވަންތަކަން އަންނަން އޮތް ޖީލުތަކާ ހަމައަށް ފޯރުކޮށްދެވޭނީ، ދިވެހި ޅަދަރިންނާއި ޒުވާނުންގެ ހިތްތަކުގައި، ގައުމިއްޔަތުގެ ސިފަތަކަށް ހާއްސަ ލޯތްބަކާއި ގަދަރެއް އުފެދިގެން ކަމަށާއި، އެކަން ކުރުމަކީ ކޮންމެ ފަރުދެއްގެ ކޮނޑުގައި އެޅިފައިވާ ގައުމީ ޒިންމާއެއްގެ ގޮތުގައި ރައީސް ވަނީ ސިފަކުރައްވާފަ އެވެ.

ރައީސް މި ގޮތަށް ވިދާޅުވެފައިވަނީ އިންޑިއާއާއެކު އޮންނަ ގުޅުން ވަރަށް ބޮޑަށް ބަދަހިވެ، އެ ގައުމުން ދެމުން އަންނަ ގިނަ އެހީތަކާއެކު، ރާއްޖޭގެ މިނިވަންކަމާއި ސިޔާދަތަށް ނުރައްކާ ވަމުންދާކަމަށް އިދިކޮޅުން އިސްވެ ތުހުމަތު ކުރަމުންދާ ދާނޑިވަޅެއްގަ އެވެ.