ހަފްތާއަކަށް ކުޅުދުއްފުށީގެ ސްކޫލްތައް ބަންދުކޮށްފި

ކޮވިޑް-19 ފެތުރިދާނެކަމުގެ ބިރުވެރިކަމާއެކު ކުޅުދުއްފުށި ސިޓީގެ ސްކޫލްތައް ބަންދުކޮށްފި އެވެ.

އެޑިއުކޭޝަން މިނިސްޓްރީގެ އޮފިޝަލަކު ކޭއޯއަށް ވިދާޅުވީ، ސްކޫލްތައް ބަންދުކުރީ ހަފްތާއަކަށް ކަމަށާ ސްކޫލްތައް ބަންދުކުރިނަމަވެސް ގުރޭޑް 10 އަދި 12 ގެ ދަރިވަރުންގެ ޓެސްޓްތައް ކުރިއަށްދާނެ ކަމަށެވެ.

ކުޅުދުއްފުށީގައި މަސައްކަތްކުރާ ފުލުހުންނާއި ސިފައިންގެ ތެރެއިން ނެގި ރޭންޑަމް ސާމްޕަލުތަކަކުން ދެ ފުލުހަކު ޕޮޒިޓިވްވެ އެތަނުން އެ ފުލުހެއްގެ އާއިލާގެ ހަތަރު މެމްބަރުން ވަނީ ޕޮޒިޓިވްވެފަ އެވެ.

އޭގެ ތެރޭގައި ދިހަ އަހަރުގެ ދެ ކުދިން ހިމެނޭއިރު 75 އަހަރު ހައިރިކްސް މީހެއްވެސް ހިމެނެ އެވެ. އަދި އެކަމާ ގުޅިގެން މިހާރު ކުރިއަށްދާ ކޮންޓެކްޓް ޓްރޭސިންގައި ސްކޫލް ކުދިން ހިމެނޭހެން ގިނަ ބަޔަކު ވަނީ ކަރަންޓީނުކޮށްފަ އެވެ.

އަދިވެސް ކޮންޓެކްޓް ޓްރޭސިން ކުރިއަށްދާތީ އެކަހެރިކުރި މީހުންގެ އަދަދު ކަމާ ގުޅުން ހުރި ފަރާތްތަކުން ހާމަކޮށްފައެއް ނުވެ އެވެ.