އޮންލައިކޮށް ގަހާއި ޖަނަވާރު އިމްޕޯޓް، އެކްސްޕޯޓް ކުރަން އެދެވޭގޮތް ހަދައިފި

ގަސްގަހާއި ގެއްސާއި ޖަނަވާރު ރާއްޖެ އެތެރެކުރުމާއި ރާއްޖެއިން ބޭރުކުރުމަށް އޮންލައިންކޮށް އެޕްލިކޭޝަން ހުށައެޅުމުގެ ފުރުސަތު މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ހުޅުވާލައިފި އެވެ.

މިނިސްޓްރީން ބުނީ އެގްރިކަލްޗަރ އޮންލައިން ސިސްޓަމް މެދުވެރިކޮށް އޮންލައިންކޮށް މިހާރު ގަސްގަހާއިގެއްސާއި ޖަނަވާރު އިންޕޯޓް އެކްސްޕޯޓަށް އެދި ހުށައެޅޭނެކަމަށެވެ.

އެގްރިކަލްޗަރ އޮންލައިން ސިސްޓަމް އިފްތިތާހް ކޮށްފައިވަނީ މިއަހަރުގެ ދަނޑުވެރިންގެ ދުވަހާއި ގުޅުވައިގެންނެވެ. މިއީ އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ)ގެ އެހީގައި، މޯލްޑިވްސް ސިންގްލް ވިންޑޯ ޕްރޮޖެކްޓުގެ ބައެއްގެ ގޮތުގައި ތަރައްޤީކޮށްފައިވާ އެޕްލިކޭޝަނެކެވެ.

މިސިސްޓަމް މެދުވެރިކޮށް ފޯރުކޮށްދޭނެ މައިގަނޑު ހިދުމަތްތަކުގެ ތެރޭގައި ގަސްގަހާގެއްސާއި ޖަނަވާރު އިމްޕޯޓް އަދި އެކްސްޕޯޓްކުރުމުގެ ހުއްދަ ދިނުމުގެ މަސައްކަތާއި، ކަރަންޓީން ޔުނިޓުން ފޯރުކޮށްދެމުން އަންނަ ހިދުމަތްތައް ހިމެނެއެވެ. އަދި ވެޓިނަރީ ހިދުމަތްތަކަށް އެދި ހުށަހެޅުމުގެ ފުރުސަތުވެސް މި އެޕްލިކޭޝަންގެ ތެރެއިން ލިބޭނެކަމަށް މިނިސްޓްރީން ބުންޏެވެ..

މި އެޕްލިކޭޝަން ބޭނުންކުރެވޭނީ، މޯލްޑިވްސް ސިންގްލް ވިންޑޯ މަޝްރޫއުގެ އެހެން އެޕްލިކޭޝަންތައް ބޭނުން ކުރާ ފަދައިން، 'އީ-ފާސް' ލޮގިން މެދުވެރިކޮށެވެ.