ކުޅުދުއްފުށީ ބަނދަރު ބޮޑުކުރުމުގެ ބޮޑުބައި ނިންމާލައިފި

ކުޅުދުއްފުށީ ވެލިގަނޑު ސަރަހައްދުގައި މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ހަވާލުކޮށްގެން ސަރުކާރުން ހަދަމުންދާ ލޯކަލް ބަނދަރުގެ 98 އިންސައްތަ މަސައްކަތް ނިމިފައިވާކަމަށް އެ ކުންފުނިން ބުނެފި އެވެ.

އެމްޓީސީސީއިން ބުނީ ކުޅުދުއްފުށީ ބަނދަރު ފުޅާކޮށް ބޮޑުކުރުމުގެ މަޝްރޫއުގެ މަސައްކަތުގެ 98 ޕަސެންޓް މިހާރުވަނީ ނިމިފައިކަމަށާއި މި މަޝްރޫއުގެ ތެރެއިން ކުރިން ފުންކޮށްފައިވާ ފަޅު އަލުން ފުންކުރުމުގެ މަސައްކަތުގެ 30 ޕަސެންޓް ވެސް ވަނީ ނިމިފައި ކަމަށެވެ.

އެކުންފުނިން ބުނީ މި މަޝްރޫއުގެ މަސައްކަތް މުޅިން ނިންމާލެވޭނެ ކަމަށް ލަފާކުރެވެނީ މިމަހުގެ ނިޔަލަށް ކަމަށެވެ.

Work on Hdh. Kulhudhuffushi Harbour Expansion Project is nearing completion, with overall 98% project progress. Maintenance Dredging works for the project is currently ongoing, with 30% completion. The project is scheduled to be completed on 30 October 2020. pic.twitter.com/Lk760C3wAG

— MTCC Plc (@MTCCPlc) October 22, 2020

މި މަޝްރޫއުގެ ދަށުން، 236،844 ކިއުބިކް މީޓަރުގެ ސަރަހައްދެއްގެ ފަޅު ފުންކުރުމާއި، 24،450 ކިއުބިކް މީޓަރުގެ ސަރަހައްދެއްގެ ބިން ހިއްކުމާއި، 1000 މީޓަރުގެ ސަރަހައްދެއްގައި އެއްގަމުތޮށި ލުމަށް ބޭނުންވާ ކޮންކްރީޓް މަސައްކަތްތައް ކުރުމާއި، އެއްގަމުތޮށި ހިމެނޭ ސަރަހައްދުގެ ބިންގަނޑު އެއްވަރު ކުރުމާއި، އެ ސަރަހައްދުގައި ގައު އެތުރުމާއި، ކާނުގެ މަތިގަނޑު އެޅުން ހިމެނޭ ކަމަށެވެ.

މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫއުއަކީ 129،529 މިލިއަން ރުފިޔާގެ މަޝްރޫއެކެވެ. މި މަޝްރޫއު މޮބިލައިޒް ކުރެވިފައިވަނީ 26 ޑިސެމްބަރ 2018 ގައެވެ.