އަތޮޅު ކައުންސިލުން މިއަހަރު ރޭވި ގިނަ ޕްރޮގުރާމްތައް ނުހިންގުނީ ކޮވިޑާ ހެދި: ވަސީމް

ހދ އަތޮޅު ކައުންސިލުން މިއަހަރުގެ ވާރކް ޕްލޭންގައި ހިމެނި ޕްރޮގުރާމްތައް އެންމެ ފަހު ވަގުތާ ޖެހެންދެންވެސް ހިންގުމަށް މަޑުކުރިކަމަށާ އެކަމަކު އެ ޕްރޮގުރާމްތައް ނުހިންގުނީ މުޅި ދުނިޔެއަށް ކުރިމަތިވި ކޮވިޑް-19 ގެ ބަލިމަޑުކަމުގެ ސަބަބުންކަމަށް އެކައުންސިލްގެ ރައީސް ރައީސް މުހައްމަދު ވަސީމް ވިދާޅުވެއްޖެ އެވެ.

ހދ އަތޮޅު ކައުންސިލުން އިއްޔެ ބޭއްވި 159 ވަނަ ބައްދަލުވުމުގައި ވާހަކަދައްކަވަމުން ވަސީމް ވިދާޅުވީ، 2020 ވަނަ އަހަރު އެކައުންސިލުން ބަޖެޓްގައި ހިމެނި ވަރަށް ގިނަ ކަންތައްތައް ދުނިޔެ މިވަގުތު ތަހައްމަލުކުރާ ކޮވިޑް-19 ގެ ސަބަބުން ނުކުރެވިވާ ކަމަށެވެ. އަދި އަހަރުގެ އެންމެފަހު 60 ދުވަހަށްވީއިރުވެސް އެ ޕްރޮގުރާމްތައް ބޭއްވޭނެ މާހައުލެއް ލިބިފައިނުވާތީ ވާރކް ޕްލޭން ރިވިއުކޮށް ފާސްކުރަން ނިންމީ ކަމަށެވެ.

އެ ކައުންސިލުން މިއަހަރު ކުރަން ރޭވި ބައެއް ކަންތައްތައްވެސް ވަސީމް ވަނީ ހިއްސާކުރައްވާފަ އެވެ. އެގޮތުން އަންހެން އަދި ފިރިހެން ވޮލީ މުބާރާތަކާއި އަތޮޅު ގުރުއާން މުބާރާތާއި ފުލުހުންނާ ގުޅިގެން އަތޮޅުގެ ދެ ރަށެއްގައި ހިންގުމަށް ނިންމި ކުށްމަދު ކުރުމުގެ ޕްރޮގުރާމަކާއި ކާރިސާ އެކުލަވާލުމާ ބެހޭ މަސައްކަތުގެ ބަދަލުވުމަކާއި ރަށު ކައުންސިލްތަކުގައި މެދުގައި ބޭއްވޭ ލާމަރުކަޒީ ކުއިޒް އާއި ތިލަދެކުނު އެވޯށް ނައިޓް ފަދަ މުހިންމު ޕްރޮގުރާމްތައް ބޭއްވިފައިނުވާކަން އޭނާ ފާހަގަކުރެއްވި އެވެ.

މި ބައްދަލުވުމުގައި ވަނީ ވާރކް ޕްލޭން ރިވިއުކޮށް ފާސްކޮށްފަ އެވެ. ރިވިއުކޮށް ފާސްކުރިއިރު ރިޔާސަތުން ވަނީ މުހިންމު ދެ ޕްރޮގުރާމެއް މިއަހަރު ހިންގުމަށް ވާރކް ޕްލޭންގައި ހިމަނާފަ އެވެ. އެއީ އަތޮޅުގެ ހުރިހާ ރަށެއްގެ ބަނދަރު ޒީނަތްތެރިކުރުމާއި ކާރިސާތަކުގައި ބޭނުންކުރުމަށް އަތޮޅުގެ ރަށްތަކަށް ޕަމްޕް ހަދިޔާކުރުމެވެ.

"ޖުމްލަކޮށް މައިގަނޑު ދެ ކަމެއް އަލަށް މި ހުށަހެޅުނު މި ރިވައިސްކުރެވުނު ވޯކްސް ޕްލޭންގައި މިހިމެނެނީ، އެއީ ހުރިހާ ރަށެއްގައިވެސް ބަނދަރު ޒީނަތްތެރިކުރުމާއި 650000 ރުފިޔާ ހިމެނުމާއި ދިމާވާ ކާރިސާތަކުގައި ބޭނުންކުރުމަށް ޕަމްޕް ހަދިޔާކުރުން." ވަސީމް ވިދާޅުވި އެވެ.

އަތޮޅު ކައުންސިލްގެ ބައްދަލުވުމުގައި އިއްޔެ ވަނީ ކައުންސިލްގެ ހަތަރު މެމްބަރުން ބައިވެރިވެލައްވާފަ އެވެ. ބައިވެރިނުވާ ހަމައެކަނި މެމްބަރަކީ މަކުނުދޫ ދާއިރާގެ މެމްބަރު އަލީ އިބުރާހިމެވެ.