ކުޅުދުއްފުށީގެ ކުނި މެނޭޖްކުރުމަށް ބޭނުންވާ ބައެއް ވެހިކަލް ގެނެސްފި

ކުޅުދުއްފުއްޓަށް ދިމާވެފައިވާ ޒަމާންވީ ކުނީގެ މައްސަލަ ހައްލުކުރުމަކީ މި ސަރުކާރުގެ އަމާޒެކެވެ. އެންވަރަޔަމެންޓް މިނިސްޓަރު ވަނީ ކުޅުދުއްފުއްޓަށް ވަޑައިގެން ކުނިގޮނޑަށް ޒިޔާރާތްކޮށް އެމައްސަލަ ހައްލުކުރައްވާނެކަމަށް ވިދާޅުވެފަ އެވެ.

ކުނީގެ މައްސަލަ އަކީ އެތަކެއް ޒަމާންވީ ބޮޑު މައްސަލައެކެވެ. އެތަކެއް އަހަރުތަކެއް ވަންދެން ޖަމާކޮށް، ނައްތާނުލެވިފައިވާ ކުނިތަކުގެ ސަބަބުން އެތަކެއް މައްސަލަތަކެއް ދަނީ ކުރިމަތިވަމުންނެވެ. އެކަމަކު މިސަރުކާރުން އެމައްސަލަ ހައްލުކުރުމުގެ ގޮތުން މިވަނީ ބައެއް ވެހިކަލްތައް ކުޅުދުއްފުއްޓަށް ގެނެސްފަ އެވެ.

އެގޮތުން އެންވަޔަރަންމެންޓް މިނިސްޓްރީން ފޮނުވި ދެ ޑަމްޕް ޓްރަކް މިވަނީ ކައުންސިލާ ހަވާލުކޮށްފަ އެވެ. ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން ވިދާޅުވީ، ކުނި މެނޭޖްކުރުމަށް ބޭނުންވާ ވެހިކަލްތަކުގެ ތެރެއިން ހަތަރު ޓަނުގެ ދެ ޑަމްޕް ޓްރަކް މިއަދު ކައުންސިލަށް ލިބިފައިވާ ކަމަށެވެ.

ކޮޗިން ފެރީ މަގުން ގެނައި މިތަކެއްޗަކީ މިނިސްޓްރީން ކައުންސިލާ ހަވާލުކޮށްފައިވާ ތަކެތި ކަމަށާ އެކަމަށް ބޭނުންވާ ލޯޑަރެއްވެސް އަވަސް މުސްތަގުބަލެއްގައި ލިބިގެންދާނެ ކަމަށެވެ. އޭނާ ވިދާޅުވީ، ކޮޗިން ފެރީ ކުރިއަށް އޮތް ދަތުރުގައި ލޯޑަރު ގެންނާނެކަމަށެވެ. ކުޅުދުއްފުށީގެ އިތުރުން ގދ ތިނަދޫގެ ކުނިމެނޭޖްކުރުމަށްވެސް މިނިސްޓްރީން ވެހިކަލް ފޯރުކޮށްދިނުމަށްވަނީ ހަމަޖެހިފަ އެވެ.

ކުޅުދުއްފުށީ ކުނިކޮށީގައި ހުރި ކުނިތައް ނަގައި ސާފުކުރުމާ މިނިސްޓްރީން ހަވާލުވެފައިވާއިރު އެ ކުނިތައް ފުރަތަމަ ގެންދަން ހަމަޖެހިފައިވަނީ ހދ ކުނބުރުދޫއަށެވެ.

މިނިސްޓަރު ހުސެއިން ވިދާޅުވެފައިވަނީ، ކުނބުރުދޫއަށް ކުނި ގެންގޮސް ފްރޮސެސް ކުރުމަށްފަހު އަންދަން ޖެހޭ ކުނި ގެންދަން ނިންމާފައިވަނީ ރ ވަންދޫއަށް ކަމަށެވެ.

ކުނބުރުދޫއަށް ކުނި ޖަމާކުރިނަމަވެސް މިނިސްޓްރީން ބޭނުންވަނީ އެރަށުގެ ގުރުރަތީ ރީތިކަން ވީހާވެސް ނުގެއްލޭނެ ފަދަ ގޮތަކަށް އެކަން ކުރުން ކަމަށާ އެގޮތުން ރަށް ހަލާކުވާ ފަދަ ކަންތައްތައް ކުރަން މިނިސްޓްރީން ބޭނުންނުވާ ކަމަށެވެ.