ކުޅުދުއްފުށީ މެޖިސްޓްރޭޓް ކޯޓަށް ފަނޑިޔާރަކު އައްޔަންކޮށްފި

ހދ. ކުޅުދުއްފުށި މެޖިސްޓްރޭޓް ކޯޓުގެ މެޖިސްޓްރޭޓް ކަމަށް ބޭފުޅަކު އައްޔަން ކުރައްވައިފި އެވެ.

މި މަގާމަށް އައްޔަން ކުރައްވާފައިވަނީ ހދ. ކުޅުދުއްފުށި ނޫރަންގޭ މުހައްމަދު އިސްމާއިލްއެވެ. މުހައްމަދު އިސްމާއީލް ފަނޑިޔާރުކަމަށް އައްޔަން ކުރެއްވީ ކުރިން ކުޅުދުއްފުށީ ކޯޓުގެ މެޖިސްޓްރޭޓުގެ މަގާމުގައި ހުންނެވި މުހައްމަދު މައުސޫމް އެ މަގާމުން އިސްތިއުފާ ދެއްވުމާއި ގުޅިގެންނެވެ.

މުހައްމަދު އިސްމާޢީލް ވަނީ ދިވެހިރާއްޖޭގެ ގައުމީ ޔުނިވަރސިޓީ އިން ބެޗްލަރސް އޮފް ޝަރީޢާ އެންޑް ލޯ (އޮނަރސް) ހާސިލްކުރައްވާފައެވެ. އޭނާ ކުރިން ހުންނެވީ ސިވިލްކޯޓުގެ ލީގަލް އޮފިސަރެއްގެ މަގާމުގައެވެ.

މި މަގާމަށް ކުޅުދުއްފުށީ ބޭފުޅަކު އައްޔަން ކޮށްފައިމިވަނީ ގިނަ ދުވަސްތަކަށް ފަހު އެވެ.

ކުޅުދުއްފުށީ ކޯޓުގެ އިތުރުން މިއަދު ވަނީ އިތުރު 5 ރަށަކަށް ފަނޑިޔާރުން އައްޔަން ކުރައްވާފައެވެ. އެއީ ށ. ފުނަދޫ މެޖިސްޓްރޭޓް ކޯޓު، ނ. މަނަދޫ މެޖިސްޓްރޭޓް ކޯޓު، ގދ. ތިނަދޫ މެޖިސްޓްރޭޓް ކޯޓު، ރ. މަޑުއްވަރީ މެޖިސްޓްރޭޓް ކޯޓު އަދި ސ. ފޭދޫ މެޖިސްޓްރޭޓް ކޯޓެވެ.