އާސަންދަ މޯބައިލް އެޕްލިކޭޝަން ތައާރަފްކޮށްފި

އާސަންދަ މޮބައިލް އެޕްލިކޭޝަންގެ އައިއޯއެސް ވާޝަން ތައާރަފްކޮށްފި އެވެ. މި އެޕްލިކޭޝަންގެ އެންޑްރޮއިޑް ވާޝަންވަނީ މިދިޔަ ސެޕްޓެމްބަރު މަހު 27 ގައި ތައާރަފުކޮށްފަ އެވެ.

އާސަންދައިން ބުނީ އެ އެޕް ޑައުންލޯޑްކޮށް ރެޖިސްޓްރީވުމުން، އާސަންދަ ސްކީމްގެ ދަށުން ހިދުމަތް ފޯރުކޮށްދޭ ތަންތަނުގެ ތެރެއިން އާސަންދައިގެ އައު އޮންލައިން ޕޯޓަލް "ވިނަވި" ބޭނުންކުރާ ހުރިހާ ތަނަކުން، އެމީހަކު ހޯދާ ހިދުމަތްތަކުގެ ތަފްސީލު އެޕުން ފެންނަން ހުންނާނެ ކަމަށެވެ.

އޭގެ އިތުރުން ޑޮކްޓަރުން ލިޔެދެއްވާ އީ-ޕްރިސްކްރިޕްޝަން ނުވަތަ އިލެކްޓްރޯނިކް ބޭސް ސިޓީތައް ވެސް އެޕް މެދުވެރިކޮށް ބަލާލެވޭނެ އެވެ. އަދި، ނުހޯދާ ހިދުމަތެއް ލިސްޓްކޮށްފައިވާ ނަމަ އެޕް މެދުވެރިކޮށް އެކަން ރިޕޯޓްކުރުމުން އާސަންދައިން އެކަން ތަހުގީގުކުރާނެކަމަށް އާސަންދައިން ބުންޏެވެ.

އެ އެޕް ތަޢާރަފްކުރުމުގެ އެންމެ ބޮޑު މަގްސަދަކީ އާސަންދަ ސްކީމްގެ ކަންކަން ވީހާވެސް ދެފުށް ފެންނަ ގޮތަކަށް ކުރިއަށް ގެންދިއުން ކަމަށް އާސަންދައިން ބުންޏެވެ.

މި އެޕްލިކޭޝަން މިހާރު އެޕް ސްޓޯރު އަދި ޕްލޭ ސްޓޯރުން ޑައުންލޯޑް ކުރެވޭނެ އެވެ.