60،000 ރުފިޔާއަށް ވުރެ މަތިން އާމްދަނީ ލިބޭ މީހުންނަށް އާސަންދަ ދިނުން ލިމިޓްކުރަނީ

މަހެއްގެ މައްޗަށް 60،000 ރުފިޔާއަށް ވުރެ މަތިން އާމްދަނީ ލިބޭ މީހުންނަށް އާސަންދަ ނުލިބޭ ގޮތް ހެދުމަށް ނިންމައިފި އެވެ.

ރައީސް މުއިއްޒު މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ވިދާޅުވީ މުއްސަނދިންނާއި އިންކަމް ޓެކްސް ދައްކާ ފަރާތްތަކަށް އަންނަ މަހުން ފެށިގެން އާސަންދަ ދޭ އުސޫލު ބަދަލުކުރުމުގެ މަސައްކަތް މިހާރު ކުރަމުންދާ ކަމަށެވެ. އެގޮތުން އާމްދަނީގެ ގޮތުގައި 60،000 އިން މަތީގެ މުސާރަ ލިބޭ ފަރާތްތަކަށް، މިހާރު ލިބޭ ގޮތަށް އާސަންދަ ދެމުން އަންނަ ގޮތް ބަދަލުވާނެ ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވި ގޮތުގައި ސަރުކާރުގެ މި ސިޔާސާތަށް އަންނަ މަހުން ފެށިގެން އަމަލުކުރެވޭނެ އެވެ.

އާސަންދައަށް ދައުލަތުގެ ބަޖެޓުން ކުރާ ހަރަދު ކުޑަކުރުމަށް އަޅާ ފިޔަވަޅާއެކު އަންނަ އަހަރުގެ ތެރޭގައި 287 މިލިއަން ސަލާމަތް ކުރެވޭނެ ކަމަށް ލަފާކުރައްވާ ކަމަށް ރައީސް ވިދާޅުވި އެވެ.

"މުއްސަނދިންނަށް ހުރިހާ ފްރީކޮށް ލިބިގެން ނުވާނެ،" ރައީސް ވިދާޅުވި އެވެ.

އާސަންދައަށް އަހަރުން އަހަރަށް ކުރަންޖެހޭ ހަަރަދުތައް އިތުރުވެ މިދިޔަ އަހަރުވެސް ދެ ބިލިއަނަށް ވުރެ ގިނަ ރުފިޔާ ހަރަދުކޮށްފައިވެ އެވެ.