ކެންޑިޑޭޓުންނަށް ހަމަހަމަ ފުރުސަތު ހޯދައިދިނުމަށް މުވައްސަސަތަކާއެކު މަޝްވަރާތައް ވަނީ ފަށާފަ

ލޯކަލް ކައުންސިލް އިންތިހާބަށް ކެމްޕޭނު ކުރުމުގެ ހަމަހަމަ ފުރުސަތު ކެންޑިޑޭޓުންނަށް ހޯދައި ދިނުމަށް ގުޅުން ހުރި އެހެން މުއައްސަސާ ތަކާއެކު މަޝްވަރާތައް ފަށާފައިވާ ކަމަށް އިލެކްޝަން ކޮމިޝަން (އީސީ) ގެ ރައީސް އަހުމަދު ޝަރީފު އާދަމް ވިދާޅުވެއްޖެ އެވެ.

"އަވަސް" ނޫހަށް ދެއްވި އިންޓަވިއެއްގައި ޝަރީފު ވިދާޅުވީ އެ ކޮމިޝަނުން، އެޗްޕީއޭ މަޝްވަރާކޮށް، ކެމްޕޭނު ކުރުމުގެ ސިޔާސަތު ތަކާއި ބެހޭގޮތުން ގޮތެއް ކަނޑައަޅާ ގޮތްތަކެއް އިއުލާނު ކޮށްދޭން އެދިފައިވާނެ ކަމަށެވެ.

އިދިކޮޅު ކެންޑިޑޭޓުން ކެމްޕޭން ކުރަން ހަމަހަމަ ފުރުސަތެއް ނެތް ކަމަށް ބުނެ ޝަކުވާތަކާއި ފާޑު ކިޔުންތައް ދަނީ އަމާޒުވަމުންނެވެ. ހާއްސަކޮށް މި ދުވަސްކޮޅު ސަރުކާރުގެ ބައެއް ވެރިން މަޝްރޫއުތައް އިފްތިތާހުކުރުމަށް ރަށްރަށް ދަތުރުކުރަމުންދާތީ ފާޑުކިއުންތައް ވަނީ އިތުރުވެފައެވެ.

ޝަރީފު ވިދާޅުވީ ހުރިހާ ކެނޑިޑޭޓުންނަށް ވެސް ހަމަހަމަ ފުރުސަތުތަކެއް ލިބިފައި އޮންނަން ޖެހޭނެ ކަމަށާއި އެޗްޕީއޭގެ ގައިޑުލައިނާއި އެއްގޮތަށް ހުރިހާ ކެނޑިޑޭޓުން ވެސް ކެމްޕޭނު ކުރެވޭނެ ކަމަށެވެ.