ރޯދަމަހުގެ ރަސްމީ ގަޑިއަކީ ހެނދުނު 9 އިން މެންދުރު 1 އަށް

ކުރިއަށް އޮތް މިއަހަރުގެ ރޯދަމަހާއި ޝައްވާލް މަހުގެ ފުރަތަމަ ހަތް ދުވަހުގެ ރަސްމީ މަސައްކަތު ގަޑިއަކީ ހެނދުނު 9:00 އިން މެންދުރުފަހު 1:00 އަށް ކަމަށް ރައީސުލްޖުމްހޫރިއްޔާ ހަމަޖައްސަވައިފި އެވެ.

ރޯދަމަހުގެ ރަސްމީ މަސައްކަތު ގަޑި އެގޮތަށް ހަމަޖެއްސި ނަމަވެސް، ރާއްޖޭގައި ކޮވިޑް ފެތުރުން އިތުރުވެފައިވުމާއެކު ސަރުކާރުގެ އިދާރާތައް އާންމުކޮށް ހުޅުވައިގެން މަސައްކަތް ކުރާނީ ކުރިން ކަނޑައަޅާފައިވާ ގޮތަށް، ވަކި އުސޫލުތަކަކާއި މިންގަނޑުތަކެއްގެ ދަށުން ކަމަށް ރައީސް އޮފީހުން މައުލޫމާތު ދެއެވެ.

އެގޮތުން ހުސްވި ފެބްރުއަރީ މަހުގެ ދެވަނަ ދުވަހު ރައީސް އޮފީހުން އާންމުކުރި އުސޫލުގައި ވާގޮތުން އެ އިދާރާއަކުން ދޭ ހިދުމަތްތަކުގެ ބާވަތް، މިންވަރު، ވަސީލަތް އަދި މުވައްޒަފުންގެ އަދަދަށް ބަލައި އިދާރާއިން ދޭ ހިދުމަތްތައް މަސައްކަތު ހަފުތާގެ އެކި ދުވަސްތަކަށް ބަހައިލައިގެން، އެކި ދުވަސްތަކުގައި އެކި ހިދުމަތް ދޭ ގޮތަށް ހަމަޖެއްސުމަށް ބުނެފައި ވެއެވެ.

މުވައްޒަފުން ގޭގައި ތިބެގެން ކުރެވެން ހުންނަ މަސައްކަތްތައް ގޭގައި ތިބެގެން ކުރާގޮތަށް ހަމަޖެއްސުމަށާއި އެއްފަހަރާ ވީހާވެސް މަދު މުވައްޒަފުން އޮފީހަށް ނެރެގެން މަސައްކަތް ކުރެވޭނެ ގޮތަށް މަސައްކަތްތައް ރޭވުމަށް ވެސް އުސޫލުގައި ވެއެވެ.