ސައުދީން ހަދިޔާކުރި ކަދުރު ބަހާނެ އުސޫލު މިނިސްޓްރީން އާންމުކޮށްފި

މި އަަހަރު ސައުދީ އަރަބިއްޔާއިން ރާއްޖެއަށް ހަދިޔާ ކުރި ކަދުރު ބަހާނެ އުސޫލު އިސްލާމިކް މިނިސްޓްރީން އާންމު ކޮށްފި އެވެ.

އެ މިނިސްޓްރީން ބުނީ އެހެން އަހަރުތަކާއި ހިލާފަށް މިއަހަރު ސައުދީއިން ރާއްޖެއަށް ހަދިޔާ ކުރީ 25 ޓަނުގެ ކަދުރު (25،000 ކިލޯ ކަދުރު) ކަމަށެވެ. އެހެން އަހަރުތަކުގައި ސައުދީއިން ރާއްޖެއަށް 50 ޓަނުގެ ކަދުރު ހަދިޔާކުރެއެވެ.

ކަދުރު ބެހުމުގައި ފަގީރުންގެ ދަފްތަރުގައި ހިމެނޭ 10،944 މީހުންނަށް އިސްކަން ދޭނެ ކަމަށާއި ދަފްތަރުގައި ރަޖިސްޓްރީވެފައިވާ ކޮންމެ މީހަކަށް އެއް ޕެކެޓް ލިބޭނެ ކަމަށް މިިނިސްޓްރީން މައުލޫމާތު ދެއެވެ.

1442 ވަނަ އަހަރުގެ ރަމަޟާންމަހަށް ދިވެހިރާއްޖެއަށް ސަޢޫދީ އަރަބިއްޔާގެ ސަރުކާރުން ހަދިޔާކުރެއްވި ކަދުރު ބެހުމުގެ އުސޫލުhttps://t.co/wt0Bgtwn95#MVIaffairs pic.twitter.com/j8QGQS0trh

— Ministry of Islamic Affairs (@MVIaffairs) April 6, 2021

މާލެ، ވިލިމާލެ އަދި ހުޅުމާލޭގައި ދިރިއުޅޭ ފަގީރުންނަށް ކަދުރު ބަހާނީ އިސްލާމިކް މިނިސްޓްރީންނެވެ. ރަށްރަށުގައި އެ މަސައްކަތް ކުރާނީ އެ ރަށެއްގެ ކައުންސިލުންނެވެ. ކަދުރު ބެހުމުގެ ކުރިން އިތުރު އިއުލާނެ ކުރާނެ ކަމަށް މިނިސްޓްރީން ބުންޏެވެ.

ދަފްތަރުގައި ހިމެނޭ ފަރާތްތަކަށް ކަދުރު ބެހުމަށްފަހު ބާކީވާ 1،556 ޕެކެޓުގެ ކަދުރު ބަހާނީ ދައުލަތުގެ އެކި މުއައްސަސާތަކަށް ކަމަށާއި އޭގެ ތެރޭގައި ކުޑަކުދިންގެ ހިޔާ އާއި ފިޔަވަތި އާއި ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒާއި މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ހުންނަ ޖަލުތައް ހިމެނޭކަަމަށް މިިނިސްޓްރީން މައުލޫމާތު ދެއެެވެ.