ކުޅުދުއްފުށި: މެންދުރާ ހަމައަށް ވޯޓުލީ ދެހާހެއްހާ މީހުން

މެންދުރު 12 ޖެހުމާއި ހަމައަށް ކުޅުދުއްފުށިން ވޯޓު ލާފައިވަނީ 2،149 މީހުންނެވެ. ގިނަ ފޮށިތައް ކައިރި ކިއުގައި އެއްވެސް ވަރަކަށް މީހުން ނެތްއިރު ވޯޓުލާން ދާން މީހުންގެ އަދަދު މަދުކަން ފާހަގަކޮށްލެވެ އެވެ.

މެންދުރާއި ހަމައަށް ވޯޓުލާފައިވަނީ 1،117 އަންހެނުންނާއި 1،032 ފިރިހެނުންނެވެ. 13 ފޮށި ކުޅުދުއްފުށީގައި ބެހެއްޓިފައިވާއިރު އެތަނުން 12 ފޮށި ހާއްސަކޮށްފައިވަނީ ކުޅުދުއްފުށީ މީހުން ވޯޓުލުމަށެވެ. ކޭއޯގެ މޮނީޓަރުން ހުރިހާ ފޮށިތަކެއް ކައިރީގައި ހަރަކާތްތެރިވަމުންދާއިރު އެ ބޭފުޅުންވެސް ފާހަގަކުރައްވަނީ އަދި ވޯޓްލާން ނުކުންނަށް މީހުންގެ އަދަދު މަދު ކަމަށެވެ.

މެންދުރާ ހަމައަށް އެންމެ ގިނަ މީހުން ވޯޓުލާފައިވަނީ ޖަލާލުއްދީން ސްކޫލްގެ ދެ ފޮއްޓަށާއި ނޮދާރން އޮފީސް ކޮމްޕްލެކްސް ފޮއްޓަށެވެ. ޖަލާލުއްދީން ސްކޫލް ހޯލުގެ އިރުމަތި ކޮޅުގައި ބަހައްޓާފައިވަނީ ފޮއްޓަށް ޖުމްލަ 202 މީހުން ވޯޓުލާފައިވާއިރު ހޯލުގެ ދެކުނުކޮޅުގައި ބަހައްޓާފައިވާ ފޮއްޓަށް ވޯޓުލީ 188 މީހުންނެވެ. އޮފީސް ކޮމްޕެލްކްސްގައި ބަހައްޓާފައި ހުންނަ ފޮއްޓަށް ވޯޓުލާފައިވަނީ 241 މީހުންނެވެ.

ވޯޓުލުމަށް ކުޅުދުއްފުށިން 5672 މީހުންވަނީ ރަޖިސްޓްރީކޮށްފަ އެވެ.