އިންޓަނެޓް އަގުތަކާ ގުޅޭގޮތުން މީޑިއާތަކުގައި ދައުރުވަނީ ތެދު މައުލޫމާތެއް ނޫން

އިންޓަރނެޓް އަގުތަކާ ގުޅޭ ގޮތުން މީޑިއާތަކުގައި ދައުރުވަމުން ދަނީ މުޅިން ތެދު މައުލޫމާތުތަކެއް ނޫން ކަމަށް ކޮމިއުނިކޭޝަން މިނިސްޓްރީއާ ހަވާލުވެވަޑައިގެން ހުންނެވި އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.

ޖުލައި މަހުން ފެށިގެން ސަރުކާރުން އިންޓަރނެޓްގެ އަގުތަކަށް ބޮޑެތި އަދި ހެޔޮ ބަދަލުތަކެއް ގެންނަން އުޅޭ ކަމަށް ބުނެ ބައެއް މީޑިއާތަކުގައި އެ ޚަބަރު ދަނީ ފެތުރެމުންނެވެ. އަދި ބައެއް އަގުތައް ވެސް ހިއްސާ ކޮށްފައިވާއިރު މިނިސްޓަރ ވަނީ އެ ޚަބަރުތައް ދޮގު ކުރައްވާފައެވެ.

މިނިސްޓަރ ވިދާޅުވީ އިންޓަރނެޓުގެ އަގު ހެޔޮކުރަން ސަރުކާރުން މުހިންމު ބަދަލުތަކެއް ގެނައުމުގެ މަސައްކަތް ކުރިއަށް ދާ ކަމަށާއި އެކި ފަރާތްތަކާއެކު މަޝްވަރާ ބައްދަލުވުންތައް ވެސް ކުރިއަށް ދާ ކަމަށެވެ. ނަަމަވެސް އަދި ވަކި ގޮތެއް ނިންމަވާފައި ނުވާނެ ކަމަށް މިނިސްޓަރ ވިދާޅުވިއެވެ. އިންޓަނެޓުގެ އަގުހެޔޮކުރުމަކީ މި ސަރުކާރުގެ ރިޔާސީ ވައުދެކެވެ.

ކޮމިއުނިކޭޝަން މިނިސްޓަރު ކަމުގައި ހުންނެވި މުހައްމަދު މަލީހު ޖަމާލުގެ އިތުބާރުނެތްކަމަށް ރައްޔިތުންގެ މަޖިލީހުން ފާސްކޮށް މިނިސްޓަރުކަމުގެ މަގާމުން މަލީހު ވަކިކޮށްފައި ވަނީ މާޗް މަހުގެ 1 ވަނަ ދުވަހުއެވެ. އޭގެފަހުން އެ މިނިސްޓްރީ ވަގުތީ ގޮތުން ހިންގަމުން އަންނަނީ އިކޮނޮމިކް މިނިސްޓަރު ފައްޔާޒެވެ.