ނަޝީދަށް ހަމަލާދިން މައްސަލާގައި ދެ މީހަކު ހައްޔަރުކޮށްފި

ރައީސް މުހައްމަދު ނަޝީދަށް ޓެރަރިސްޓް ހަމަލާދިން މައްސަލާގައި ދެ މީހަކު ހައްޔަރުކޮށްފައިވާ ކަމަށް ފުލުހުން ދެންމެ ބުނެފި އެވެ. ފުލުހުން ކުރި ޓުވީޓެއްގައި ބުނީ، މިދިޔަ ބުރާސްފަތި ދުވަހުގެ ރޭ ދިން މި ހަމަލައިގެ ތުހުމަތަށް ހައްޔަރުކުރި މީހުންގެ މައުލޫމާތު މިއަދު މެންދުރު ބާއްވާ މީޑިއާ ބްރީފިންއެއްގައި ހާމަކުރާނެ ކަމަށެވެ.

ރައީސް ނަޝީދަށް ހަމަލާ ދެވުނުއިރު އެ ސަރަހައްދުގައި ނެގިފައި ހުރި އެއްވެސް ފޮޓޯއެއް ނުވަތަ ވީޑިއޯއެއް ސޯޝަލް މީޑިއާގައި ދައުރު ނުކުރުމަށްވެސް ފުލުހުން ވަނީ ޓްވީޓްގައި އެދިފައެވެ. އެއީ އާއިލާގެ ރައްކާތެރި ކަމަށް ޓަކާ އާއި ދޮގު މައުލޫމާތެއް ފެތުރިގެން މައްސަލަ ތަހުގީގު ކުރުމަށް ބުރޫއަރާފާނެތީއެވެ.

އިއްޔެގެ ބްރީފިންގައި ޕޮލިސް ކޮމިޝަނަރު މުހައްމަދު ހަމީދު ވިދާޅުވެފައި ވަނީ، ނަޝީދުގެ ގެކޮޅު ގ. ކެނެރީގެ އިން ނުކުމެވަޑައިގެން ކާރުކޮޅަށް އަރާވަޑައިގަންނަވަން ހިންގަވާފައި ވަޑައިގަންނަވަނިކޮށް ދިން ހަމަލައާ ގުޅިގެން ހަތަރު މީހަކު ފުލުހުންގެ ސަމާލުކަމަށް އައިސްފައިވާ ކަމަށެވެ.

އޭޑީކޭ ހޮސްޕިޓަލްގައި ބޮޑު ދެ ސާޖަރީއެއް ކުރުމަށް ފަހު، މިހާރު ހާލު ރަނގަޅު ވަމުން އަންނަ ނަޝީދަށް ހަމަލަދިން މައްސަލައިގައި ހިމެނޭ މީހެއް ކަމަށް ބުނެ ސޯޝަލް މީޑިއާގައި ރޭ ފޮޓޯއެއް ވެސް ދައުރުކުރި އެވެ.