ފަލަސްތީނަށް އެހީވުމަށް ބާއްވާ ފަންޑްރެއިޒިންގައި އެވިޑް ކޮލެޖުން ބައިވެރިވެއްޖެ

ފަލަސްތީނުގެ މުސްލިމުންނާއި ދެކޮޅަށް އިސްރާއީލުގެ ޔަހޫދީން ހިންގަމުން އަންނަ ލާއިންސާނީ އަމަލުތަކާއި ގުޅިގެން ހާލުގައި ޖެހިފައިވަ ފަލަސްތީނުގެ އަޙުންނާއި އުޙުތުންނަށް އެހީވުމުގެ ފަންޑް ރައިސިންގ ހަރަކާތުގައި އެވިޑް ކޮލެޖް ސްޓޫޑަންޓް ޔޫނިއަންއިން ބައިވެރިވެއްޖެއެވެ.

މިއީ ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އަދި މާސީ އިސްވެއޮވެ، ރާއްޖޭގެ ޔުނިވާސިޓީތަކާއި އަދި ކޮލެޖް ތަކުގެ ދަރިވަރުން ގުޅިގެން ހިންގާ ހަރަކާތެއްކަމަށް އެވިޑް ކޮލެޖުން މައުލޫމާތު ދެއެވެ.

މާސީ ޖަމިއްޔާ އަކީ މިފަދަ އިންސާނީ އަދި އިޖުތިމާއީ މައްސަލަތަކަށް އެހީތެރިވުމަށް ފަންޑް ރެއިޒްކުރާ، ނޮން ޕްރޮފިޓް، ދިވެހި ޖަމިއްޔާއެކެވެ.

މި ހަރަކާތުގައި މިހާތަނަށް އެވިޑް ކޮލެޖް ގެ އިތުރުން މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ)، އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް)، ވިލާ ކޮލެޖް، ކްލިކް ކޮލެޖް، ސައިރެކްސް ކޮލެޖް، މެޕްސް ކޮލެޖް، އެމްއައި ކޮލެޖުން ވަނީ ބައިވެރިވެފައެވެ. އަދި ކުރިޔަށް އޮތްތަނުގައި އިތުރު ކޮލެޖުތަކުން ބައިވެރިވާނެ ކަމަށް ހަރަކާތް އިންތިޒާމް ކުރާ ފަރާތުން ވަނީ ބުނެފައެވެ.

އަދި މިހަރަކާތުން ލިބޭ ފައިސާ މާސީއާ ހަވާލުކުރުމަށް ނިންމާފައިވާ ކަމަށާއި، އަދި އެ ފައިސާ މާސީ މެދުވެރިކޮށް އިންޓަނޭޝަނަލް އެއިޑް ކެމްޕެއިން (އައިއޭސީ) މެދުވެރިކޮށް ފަލަސްތީނުގެ ރައްޔިތުންނަށް ފޯރުކޮށްދިނުމަށް ނިންމާފައިވާ ކަމަށެވެ.

މިގޮތުން ކުރިޔަށް ގެންދިޔުމަށް ހަމަޖެހިފައިވާ ހަރަކާތްތަކުގެ ތެރޭގައި ޓީޝާޓް ވިއްކުމާއި، މާސްކު ވިއްކުމުގެ އިތުރުން އެޗްޕީއޭގެ ހުއްދަ ލިބޭ މިންވަރަކުން މިސްކިތްތައް ކައިރީ ފަންޑު ފޮށި ބަހައްޓަން ނިންމާފައިވެއެވެ. އަދި އަމަލީގޮތުންވެސް މަސައްކަތްތައް ދަނީ ކުރެވެމުންނެވެ.

މީގެ އިތުރުން ޣާޒާ ހަނގުރާމަ އާއި ބެހޭ އެންމެ ފަހުގެ މައުލޫމާތު ދިނުމަށް ޕެނަލް ޑިސްކަޝަންތަކެއް ބޭއްވުމަށް ނިންމާފައިވާ ކަމަށް ވެސް، އެވިޑް ކޮލެޖުގެ ދަރިވަރުންގެ ކައުންސިލްގެ ރައީސް އިބްރާހިމް އިމްލާޤް ވިދާޅުވިއެވެ.

މި އިވެންޓްގައި ފަންޑް ފޮށީގެ އިތުރުން، ތިރީގައި މިވާ އެކައުންޓް ނަންބަރަށް ޓްރާންސްފާ މެދުވެރިކޮށް ވެސް އެހީތެރި ވެވޭނެއެވެ.

7770000048136 ރުފިޔާ އެކައުންޓް – ބީއެމްއެލް

7770000048137 ޑޮލަރ އެކައުންޓް ބީއެމްއެލް

މި އިވެންޓްގައި ވީހާވެސް ގިނަ ފަރާތްތަކުން ބައިވެރިވެ އެބޭފުޅަކަށް ވެވެން އޮތް މިންވަރަކުން އެހީތެރި ވުމަކީ އެވިޑް ކޮލެޖާއި އަދި އެވިޑް ސްޓޫޑަންޓް ކައުންސިލުން ވަނީ އެދިފައެވެ.