ޓެރަރިޒަމް ގާނޫނު އަނެއްކާވެސް އިސްލާހު ކުރަނީ

ޓެރަރިޒަމްގެ ގާނޫނަށް އަނެއްކާވެސް ބަދަލު ގެނައުމަށް އެޓާނީ ޖެނެރަލް އޮފީހުން ބިލެއް ފަރުމާކޮށް ރައީސް އޮފީހަށް ފޮނުވައިފި އެވެ.

އޭޖީ އޮފީހުން މިރޭ ނެރުނު ނޫސް ބަޔާނުގައި ބުނީ، ސަރުކާރުގެ ފަރާތުން މަޖިލީހަށް ހުށަހެޅުމަށް އެ ގާނުނަށް އިސްލާހު ގެނައުމުގެ ބިލު މިއަދު ރައީސް އޮފީހަށް ފޮނުވާފައިވާ ކަމަށެވެ.

އެގޮތުން ބިލުގައި 24 ގަޑިއިރު ކޯޓު އަމުރަކާއި ނުލައި ހައްޔަކު ކުރެވޭ ވަގުތު 48 ގަޑިއިރަށް ބަދަލުކުރުމަށް ބަދަލު ގެނެސްފައި ވެއެވެ.

އެންމެ ފަހުން އެ ގާނޫނު އިސްލާކޮށްފައިވަނީ 2019 ވަނަ އަހަރު ފަހުކޮޅު މަޖިލިސް ޗުއްޓީގައި އޮއްވާ ދައުރުގެ ބޭރުން ޖަލްސާއެއް ބާއްވައިގެންނެވެ. އެގޮތުން 24 ގަޑިއިރު ވަންދެން ކޯޓު އަމުރަކާ ނުލާ ހައްޔަރު ކުރެވޭ ގޮތަށް ގާނުނަށް އެފަހަރު އިސްލާހު ގެނައެވެ. އަދި ބައެއް ހައްގުތައް ހަނިކޮށް، ވަރަށް ފާޅުކަން ބޮޑު ގޮތެއްގައި ޓެރަރިމްވެސް މާނަކޮށްފައިވެ އެވެ.

ހަނގުރާމައަށް ދިޔުމަށްފަހު އަނބުރާ ރާއްޖެއަށް އަންނަ ފަރާތްތަކާމެދު އަމަލުކުރާ އިޖުރާއަތުތަކަށް ބަދަލު ގެނައުމަށްވެސް ބިލުގައި ހިމަނާފައިވާނެ ކަމަށް އޭޖީ އޮފީހުން ބުންޏެވެ.

އެގޮތުން، އެފަދަ މީހުންގެ ތެރެއިން ޓެރަރިޒަމްގެ އަމަލުތައް ކުރުމުގައި ބައިވެރިވެފައިވާ ކަމަށް ބެލެވޭ ކުށުގެ ތުހުމަތުގައިވާ ފަރާތްތަކުގެ ތަހްގީގު ވަގުތުން ވަގުތަށްވެސް ކުރިއަށްގެންދެވޭނެ ގޮތް ހަމަޖެއްސުމާއި، އެނޫން ފަރާތްތަކަކީ އެފަދަ އަމަލުތަކުގައި ސީދާ ބައިވެރިވި ފަރާތްތަކެއް ކަމަށް ނުވިނަމަވެސް، އެއީ، ޓެރަރިޒަމްގެ އަމަލުތަކަށް ހުށަހެޅިފައިވާ ނުވަތަ ހުށަހެޅުމުގެ ފުރުސަތު އޮތް ބައެއް ކަމުގައި ބަލައި، އެފަދަ އަމަލުތަކުން މުޖުތަމައު ރައްކާތެރިކުރުމަށްޓަކައި އަޅަންޖެހޭ ފިޔަވަޅުތައް އެޅުމަށާއި، އެފަދަ ފިޔަވަޅުތައް އެޅުމާއެކުގައިވެސް އެފަދަ ފަރާތްތަކަށް ދޭންޖެހޭ ރީހެބިލިޓޭޝަންގެ ފަރުވާ ދިނުމަށް މަގުފަހިކުރެވޭނެ ގޮތަށް ގާނޫނު އިސްލާހު ކުރުމަށް ހިމަނާފައިވާނެ ކަމަށް ބަޔާނުގައިވެ އެވެ.

ގާނޫނު އަނެއްކާވެސް އިސްލާހު ކުރަނީ، ޓެރަރިޒަމްގެ ކުށްތައް ތަހްގީގުކުރުމުގައި ގާނޫނު ތަންފީޒުކުރާ އިދާރާތަކަށް ކުރިމަތިވާ ބައެއް ގޮންޖެހުންތަކަށް ހައްލު ހޯދައިދިނުމަށް ކަމަށް އޭޖީ އޮފީހުން ބުންޏެވެ.