ރައީސަށް އޮތް މަޖުބޫރުކަމެއް ރައްޔިތުން ނިކުމެ ސާފު ކުރަން ވެއްޖެ: ޝިޔާމް

ރައީސުލްޖުމްހޫރިއްޔާއަށް އޮތް މަޖުބޫރު ކަމަކީ ކޮބައިކަން ރައްޔިތުން ނުކުމެ ސާފު ކުރަން ވެއްޖެ ކަމަށާއި ނޫނިއްޔާ ރައީސް ސޯލިހް އަމިއްލަފުޅަށް ސާފު ކޮށްދެއްވަން ވެއްޖެ ކަމަށް ރައްޔިތުން މަޖިލީހުގެ ނައިފަރު ދާއިރާގެ މަޖިލިސް މެމްބަރު އަހުމަދު ޝިޔާމް ވިދާޅުވެއްޖެ އެވެ.

ޝިޔާމް މިހެން ވިދާޅުވީ ރާއްޖެއިން ބޭރުގެ މީހުންނާއި ކުންފުނިތަކުގެ ސަތޭކަ އިންސައްތަ ހިއްސާ އޮންނަ ކުންފުނިތަކަށް ދިވެހިރާއްޖޭގައި އެއާޕޯޓު ހިންގޭ ގޮތަށް ފޮރިން ޑައިރެކްޓު އިންވެސްޓުމެންޓު ޕޮލިސީ (އެފްޑީއައި) އިސްލާހުކުރުމާއި ގުޅިގެން ކުރެއްވި ޓްވީޓެއްގަ އެވެ.

Verikamugai hunnevi beyfulhakah oiy majboorukamakee kobaitho rayyithun nikume saafukuran vejje. Noonee @ibusolih amillafulhah saafukohdhevvan vejje. Qaumutho rakkatherikuranvee noonee Coviduntho rakkatherivaanvee? Qaumeh ovegenthaa Covidun e qaumakah araiganeveynee. 🤔 https://t.co/cJNXQmtP1a

— Ahmed Shiyam (@Shiyamaldives) June 13, 2021

ޝިޔާމް ކުރެއްވި ޓްވީޓްގައި ވިދާޅުވީ ވެރިކަމުގައި ހުންނެވި ބޭފުޅަކަށް އޮތް މަޖުބޫރު ކަމަކީ ކޮބައިކަން ރައްޔިތުން ނުކުމެ ސާފު ކުރަން ވެއްޖެ ކަމަށާއި ނޫނިއްޔާ، ރައީސް ސޯލިހް އަމިއްލަފުޅަށް ސާފު ކޮށްދެއްވަން ވެއްޖެ ކަމަށެވެ.

ރައިސް ސޯލިހު ޓެގުކުރައްވައި ޝިޔާމް ކުރެއްވި ޓްވީޓްގައި އިތުރަށް ވިދާޅުވީ ރައްކާތެރިކުރަންވީ ގައުމުތޯއާއި ނޫނީ ރައްކާވާވީ ކޮވިޑުންތޯ އެވެ. "ގައުމެއް އޮވެގެންތާ ކޮވިޑުން އެ ގައުމަކަށް އަރައިގަނެވޭނީ" އޭނާ ވިދާޅުވި އެވެ.

އެފްޑީއައިއަށް ގެނައި މި އިސްލާހާ ގުޅިގެން އެއާޕޯޓު ހިންގުމާއި ޓާމިނަލް ހިމެނޭހެން އެއާޕޯޓު އޮޕަރޭޓުކުރުމާއި، އެއާޓްރެފިކް ކޮންޓުރޯލުކުރުމާއި ގުރައުންޑް ސާވިސް ޚިދުމަތްތައް ދިނުމުގެ ހުއްދަވެސް ބޭރުގެ ފަރާތްތަކުގެ ސަތޭކައިން ސައްތަ ހިއްސާ އޮންނަ ކުންފުނިތަކަށް ލިބިގެންދާނެއެވެ.