މުދާ އުފުލާ ދޯންޏެއް ނޮޅިވަރަންފަރު ނެރުމައްޗަށް އުރިއްޖެ

ހދ ނޮޅިވަރަންފަރު ބަނދަރަށް ވަންނަ އުޅުމުގެ ތެރޭގައި އެރަށު ނެރު މައްޗަށް މުދާ އުފުލާ ދޯންޏެއް އުރިއްޖެ އެވެ. ތިން މީހުންނާއެކު ދަތުރުކުރި މި ދޯނި އެރަށު ނެރު މައްޗަށް އުރުނީ އިއްޔެ ރޭ ގާތްގަނޑަށް 7:30 އެހާއިރު އެވެ.

އެރަށުން ވާހަކަ ދެއްކި މީހުން ކޭއޯއަށް މައުލޫމާތު ދެމުން ބުނީ ދޯނި ނެރު މައްޗަށް އުރުނީ، އެރަށަށް މުދާ ބޭލުމަށްފަހު، އެހެން ރަށަށް ގޮސް މުދާ ބަލައި އެނބުރި ނޮޅިވަރަންފަރު ބަނދަރަށް ވަންނަ އުޅުމުގެ ތެރޭގައި ކަމަށެވެ.

90 ފޫޓްގެ "އަލިސާފު" ނަމަކަށް ކިޔާ މި ދޯނި ނެރު މައްޗަށް އުރުމުން ސިފައިންގެ އެހީތެރިކަމަށް އެދުނު ކަމަށާއި އެހެންނަމަވެސް އެ މީހުންގެ އެހީތެރިކަން ލިބެން ފެށީ މިއަދު ހެނދުނުވި ފަހުން ކަމަށް އެ މީހުން ބުންޏެވެ.

އެމްއެންޑީއެފުން ބުނީ އެކަމަކުގެ ރިޕޯޓް އެފަރާތަށް ލިބިފައިވަނީ ރޭ 20:51 ހާއިރު ކަމަށާއި އެ ސައިޓްގައި އެމްއެންޑީއެފް ކޯސްޓްގާޑުގެ ޑައިވަރުން ހަރަކާތްތެރިވަމުންދާ ކަމަށެވެ. އަދި ދޯނީގެ ވެރިފަރާތުން ހަމަޖެއްސި އުޅަނދެއްގެ އެހީގައި ފުން ކުރުމުގެ މަސައްކަތް ކުރަމުންދާކަމަށް އެމްއެންޑީއެފުން މައުލޫމާތުދެ އެވެ.

މި ދޯނި ފަރަށް އެރިއިރު ތިބީ ދިވެއްސަކާއި ދެ ބިދޭސީންނެވެ. މި ހާދިސާގައި އެއްވެސް މީހަކަށް ގެއްލުންވެފައެއްނުވެ އެވެ.