އެވިޑް ކޮލެޖް: މަތީ ތައުލީމަށް ފަހި ފުރުސަތުތަކެއް، 70 އަށްވުރެ ގިނަ ކޯހަށް ފުރުސަތު ހުޅުވާލައިފި

މިއަހަރުގެ ސެޕްޓެމްބަރު މަހުގެ ފުރަތަމަ ހަފްތާގައި އެވިޑް ކޮލެޖުން ފެށުމަށް ހަމަޖައްސާފައިވާ ކޯސްތަކުގައި ބައިވެރިވުމުގެ ފުރުސަތު އެކޮލެޖުން މިއަދު ރަސްމީގޮތުން ހުޅުވާލައިފި އެވެ. އެކަން އިއުލާން ކުރެއްވީ އެވިޑް ކޮލެޖުން މިއަދު މީޑއާއާ ހިއްސާކުރެއްވި ވީޑިއޯއެއް މެދުވެރިކުރައްވައި ވާހަކަފުޅު ދައްކަވަމުން ޗެއަރަމަން އަބްދުﷲ މުސްތާޤް ރަޝާދެވެ.

މުސްތާޤް ވިދާޅުވީ އެވިޑް ކޮލެޖުން ބޭނުންވަނީ ތަފާތު ގިނަ ދާއިރާތަކުގެ ޕްރޮގްރާމްތަކުން ރަނގަޅު ފެންވަރެއްގައި ދިވެހިރާއްޖޭގެ ރައްޔަތުންނަށް މަތީ ތައުލީމު ލިބޭނެ ފުރުސަތު ފަހިކޮށްދިނުން ކަމަށެވެ. އަދި އެފުރުސަތުގެ ބޭނުން ހިފައިގެން މަތީ ތައުލީމު ހާސިލްކޮށްގެން ނުކުންނަ ދަރިވަރުންނަކީ ހެޔޮގޮތުގައި މުޖުތަމައަށް ފައިދާކުރަނިވިބަޔަކަށް ހެދުން ކަމަށެވެ.

އެވިޑް ކޮލެޖުން ބުނީ ތަފާތު ގިނަ ދާއިރާތައް ހިމެނޭގޮތަށް ހަތްދިހައަށް ވުރެ ގިނަ ކޯސް އެވިޑް ކޮލެޖުގައި މިފަހަރުވެސް ކުރިއަށް ގެންދިއުމަށް ހަމަޖައްސާފައިވާ ކަމަށެވެ. އެގޮތުން ކޯސްތައް ހިންގާ ދާއިރާތަކުގެ ތެރޭގައި ބިޒްނަސް އެޑްމިނިސްޓްރޭޝަން ، ޕްރޮޖެކްޓް މެނޭޖްމެންޓް ، ހިއުމަން ރިސޯރސް މެނޭޖްމެންޓް ، އެކައުންޓިންގ އެންޑް ފައިނޭންސް ، އިންފޮރމޭޝަން ޓެކްނޮލޮޖީ ، އޮފީސް މެނޭޖްމެންޓް ، އެޑިޔުކޭޝަނަލް ލީޑަރޝިޕް ، ޓީޗިންގ ސެކަންޑްރީ ، ޓީޗިންގ ޕްރައިމަރީ ، އާރލީޗައިލްޑްހުޑް އެޑިޔުކޭޝަން ، ޝަރީއާ އެންޑް ލޯ، ޤުރުއާން ޓީޗިންގ ، ސައިކޮލޮޖީއާއި ކައުންސެލިންގ އަދި އިންކްލޫސިވް އެންޑް ސްޕެޝަލް އެޑިޔުކޭޝަން ހިމެނެ އެވެ.

މިދާއިރާތަކުގެ ސެޓްފިކެޓް ލެވެލް ، ޑިޕްލޮމާ ލެވެލް ، އެސޯސިއޭޓް ޑިގްރީ ލެވެލް ، ބެޗްލަރސް ޑިގްރީ ލެވެލް އަދި މާސްޓަރސް ލެވެލްގެ ކޯސްތައް އެވިޑް ކޮލެޖްގައި ހިންގަމުންގެންދެއެވެ.

މީގެ ކުޑަދުވަސްކޮޅެއް ކުރިން އެވިޑް ކޮލެޖްގައި އަލަށް އުފެދި ފެކަލްޓީއެއް ކަމުގައިވާ " އެވިޑް ސްކޫލް އޮފް އޭވިއޭޝަން " އާއިބެހޭ އެންމެ ފަހުގެ މައުލޫމާތުތައްވެސް މިއަދުގެ ވީޑިއޯ މެސެޖްގައި ޗެއަރމަން ހިއްސާކުރެއްވި އެވެ. އޭނާ ވިދާޅުވީ ރާއްޖޭގެ އޭވިއޭޝަން އިންޑަސްޓްރީގައި ހިދުމަތްކުރުމަށްޓަކައި ކަމަށްގާބިލް ދަރިންތަކެއް އުފެއްދެވުމަށް ބޭނުންވާ ކަމަށެވެ. މިގޮތުން ބޭނުންތެރި ތަފާތު ގިނަ ޕްރޮގްރާމްތައް އެފެކަލްޓީއިން އުފައްދައި އެފުރުސަތު އާންމުކުރުމުގެ މަސައްކަތްވެސް ކުރިއަށްގެންދާކަން ފާހަގަކުރެއްވި އެވެ.

އެކަމަށްޓަކާ އެ ކޮލެޖަށް ފަންނީ ބޭފުޅުންގެ އިރުޝާދު ބޭނުންވާ ކަމަށާ އެފަދަ ފަރާތްތަކަށް މަރުހަބާ ކިޔާކަމަށް އެ ކޮލެޖުގެ ޗެއާމަން ހާމަކުރެއްވި އެވެ.

އެވިޑް ކޮލެޖްގެ ކޯސްތަކާބެހޭ މައުލޫމާތު ސާފުކުރެއްވުމަށް އެވިޑް ކޮލެޖް ތިނަދޫ ކެމްޕަހަށް ގުޅާނީ 6846768 ނުވަތަ 7516080 ނަންބަރަށެވެ. މާލޭގައި ހިންގާ ޑައިމަންޑް ކެމްޕަހަށް ގުޅާނީ 3006768 ނުވަތަ 7883228 ނަންބަރަށެވެ.

އެވިޑް ކޮލެޖަކީ ދިވެހިރާއްޖޭގައި ހިންގާ އެންމެ ބޮޑު އަމިއްލަ އެއްކޮލެޖެވެ. އެކޮލެޖުގައި އަބަދުވެސް ކޯސްތައް ހިންގަމުންގެންދަނީ އާންމު ރައްޔިތުންނަށް އަތްފޯރާފަދަ އަގެއްގައެވެ. އަދި ދަރިވަރުންނަށް ފަސޭހައިން ފައިސާ ދެއްކޭގޮތަށް ބައްޓަންކޮށްގެންނެވެ. މިހާރުވެސް އެވިޑް ކޮލެޖްގައި އެކިއެކި ކޯސްތަކުގައި ދެހާހަށްވުރެ ގިނަ ދަރިވަރުން މަތީ ތައުލީމު ހާސިލްކުރަމުންގެންދެ އެވެ.