އިދިކޮޅުން މިއަދު ކުޅުދުއްފުށީގައި ހިންގަން ނިންމި ހަރަކާތްތައް ކުރިއަށްނުގެންދަން ފުލުހުން އަންގައިފި

ކުރީގެ ރައީސް އަބުދުﷲ ޔާމީން އަބުދުލް ގައްޔޫމް މިނިވަންކުރަން ގޮވާލައި މިއަދު ކުޅުދުއްފުށި ސިޓީގައި ކުރިއަށްގެންދަން ނިންމި ހަރަކާތްތައް ކުރިއަށްނުގެންދަން ފުލުހުން އަންގައިފި އެވެ.

ޕީޕީއެމުން ނިންމާފައިވަނީ މިއަދު މެންދުރުފަހު 2 ޖަހާއިރު އެއާޕޯޓް ސަރަހައްދު (ބީޗް) ކައިރީގައި ރައީސް ޔާމީން މިނިވަންކުރުމަށް ގޮވާލައި ސުލްހަވެރި އިހްތިޖާޖެއް ބޭއްވުމަށެވެ. އަދި މިރޭ އާހަމާގައި ޕާޓީގެ ބައްދަލުވުމެއް ކުރިއަށްގެންދިޔުމަށެވެ. އަދި އެކަން ވަނީ އިއްޔެއާ މިއަދު އަޑުގަދަކުރާއިން ރަށުތެރޭގައި ގޮވާފަ އެވެ.

ޕީޕީއެމް ކުޅުދުއްފުށި ސްޓެއަރިންގ ކޮމެޓީގެ ނައިބު ރައީސް މުޖުތަބާ އަހުމަދު ވިދާޅުވީ މިއަދު 10 ޖަހާއެހާއިރު ސްޓެއިރު ކޮމެޓީގެ ދެ ބޭފުޅަކު ފުލުހަށް ހާޒިރުކޮށްފައި ރައީސުލް ޖުމްހޫރިއްޔާގެ ވާޖިބަށް ހުރަސް އެޅޭނެ ގޮތަށް ކުރިއަށް ނުގެންދެވޭނެކަމަށެވެ.

"އެހެންވީމަ މިވީއިރު ތެރޭގައި ސިޔާސީ ޕާޓީއެއް ސިޔާސީ ހަރަކާތް ހިންގުން ހުއްޓާލަން އަންގައިފި ދިވެހި ފުލުހުން. ކުރިއަށް ނުޖެންދެވޭނެކަމަށް އަންގައިފި. ޖަގަހާގައިވެސް އަޑު އިވޭވަރަށް އެއްވެސް ކަމެއް ނުކުރެވޭނެކަމަށް އަންގައިފި." މުޖުތަބާ ވިދާޅުވި އެވެ.

އޭނާ ވިދާޅުވީ، ހަރަކާތް ހިންގަން ރައީސްގެ ދަތުރުފުޅާ ގުޅުވައިގެން ނޫން ކަމަށާއި ފުލުހުން އެނގިޔަސް ހުރިހާކަމެއްވެސް ކުރިއަށްގެންދާނެ ކަމަށެވެ. އެއްވެސް ކަމެއް ހުއްޓާނުލާނެކަމަށް އޭނާ ތަކުރާރުކޮށް ވިދާޅުވި އެވެ.

"ސިޔާސީ މަސައްކަތް ކުރަން ނުކުމެ މިތިބީ ހަމަ ތަސައްވުރު ފުދިގެންކަމަށް އަހަރެމެން ގަބޫލުކުރަނީ. ހަމަ ބަޔަކު އެއްޗެކޭ ބުނާއިރަކަށް ފަހަތު ފަޔަށް ބަރުވެފައި ހީބިހި ނަގައިގެން ވަންނަ ގޮތަކަށް ނޫން މިތިބީއެއް. އެއަށްވުރެ ބޮޑަށް ސަރުކާރު މިއޮތީ ފެއިލްވެފައި. އިދިކޮޅު ފަރާތްތަކަށް ބިރު ދައްކަން ކުރާ މަސައްކަތުގައި އެއްވެސް ވަރަކަށް ފަހަތަށް ނުޖެހޭނަން." މުޖޭ ވިދާޅުވި އެވެ.

"އެހެންވީމަ އަޅުގަނޑުމެން އެ ފަޅި ދޫކޮށްލާފައި ހަމަ ތަން އޮތްތަނުގައި އެމަނިކުފާނުގެ ވާޖިބަށްވެސް ހުރަސް ނޭޅޭނެހެން ކަންކަން ކުރަން. އެގަޑިއާއި ސީދާ ވިޔަސް އެއްވެސް ވަރަކަށް ގޯސްނުވާނެ ހެން އަހަރެމެންގެ އަޑުއުފުލުން ކުރިއަށްދާނެ ބީޗް ސަރަހައްދުގައި." މުޖުތަބާ ވިދާޅުވި އެވެ.