އެމްބެސަޑާ ބްރޭންޑުގެ ވެޖެޓަބަލް ކްރީމް ބޭނުން ނުކުރަން އަންގައިފި

އެމްބެސެޑާ ބްރޭންޑްގެ ވެޖިޓަބަލް ކްރީމް ރާއްޖެ އެތެރެ ނުކުރުމަށާއި ނުވިއްކުމަށް އަދި ބޭނުން ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އަންގައިފިއެވެ.

އެ އޮތޯރިޓީން ނެރުނު ނޫސްބަޔާނެއްގައި ބުނީ އެމްބެސަޑާ ބްރޭންޑްގެ ވެޖެޓަބަލް ކްރީމް އުފެއްދުމުގައި "ލޯކަސްޓް ބީން ގަމް ބޭނުންކޮށްފައިވާ ކަމަށާއި އެކަމަކު އެ އިންގްރީޑިއަންޓް "އެތިލީން އޮކްސައިޑް" ކިޔާ ކެމިކަލަކުން ތަގައްޔަރުވެފައިވާ ކަމުގެ މައުލޫމާތު ޔޫރަފްގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑުން އަންގާފައިވާ ކަމަށެވެ.

އެހެންކަމުން އެމްއެފްޑީއޭ އިން ވަކި އެއްޗެއް އަންގަންދެން އެމްބެސެޑާ ވެޖިޓަބަލް ކްރީމް ބޭނުން ނުކުރުމަށް އެ އޮތޯރިޓީއިން ވަނީ އަންގާފައެވެ.

ކުޑަކުދިންނަށް ކާންދިނުމަށް ބޭނުންކުރާ މުޝީ ބްރޭންޑްގެ ތަށިވެސް ބޭނުން ނުކުރުމަށް އެމްއެފްޑީއޭއިން ވަނީ މި ހަފްތާ ތެރޭ އަންގާފައެވެ.