ވެކްސިން ނުޖަހާ ސަރުކާރުގެ މުވައްޒަފުން ކޮންމެ ދެ ހަފުތާއަކުން ޓެސްޓު ހަދަންޖެހޭ

ކޮވިޑް ވެކްސިން ފުރިހަމަ ނުކުރާ ސިވިލް ސާވިސްގެ މުވައްޒަފުން އަންނަ މަހުން ފެށިގެން ކޮންމެ ދެ ހަފުތާއަކުން ނެގެޓިވް ޕީސީއާރު ޓެސްޓެއް ހަދައި އެ ހުށަހަޅަން ސިވިލް ސާވިސް ކޮމިޝަން (ސީއެސްސީ) އިން ލާޒިމުކޮށްފި އެވެ.

ސިވިލް ސާވިސް ކޮމިޝަނުން މިއަދު އާންމުކުރި، ވަޒީފާއަށް ނުކުތުމުގައި އަމަލުކުރަންވީ ގޮތާ ބެހޭ ގަވާއިދުގައިވާ ގޮތުން، ސަރުކާރު މުވައްޒަފުންގެ ތެރެއިން ވެކްސިންގެ އެއްވެސް ޑޯޒެއް ފުރިހަމަކޮށްފައި ނުވާ މުވައްޒަފުންނަން ސެޕްޓެމްބަރު އެކަކުން ފެށިގެން ވަޒީފާއަށް ނުކުމެވޭނީ ޕީސީއާރު ޓެސްޓު ހަދައިގެންނެވެ.

އެއަށްފަހު ކޮންމެ 14 ދުވަހަކުން ޕީސީއާރު ޓެސްޓު ހަދައިގެން ވަޒީފާއަށް ނުކުތުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު އަންގާފައިވާ ކަަމަށް ސިވިލް ސާވިސް ކޮމިޝަނުން ބުނެއެވެ.

ސަރުކާރުގެ ހުރިހާ އޮފީހަކުން މި ގަވާއިދަށް އަމަލުކުރާކަން ކަށަވަރު ކުރުމަށާއި ވެކްސިނަށް ޝަރުތު ހަމަވި ނަމަވެސް އެއްވެސް ޑޯޒެއް ނުޖަހާ މުވައްޒަފުން ވެކްސިން ޖެހުމަށް އެ ކޮމިޝަނުން ވަނީ ސަރުކާރުގެ ހުރިހާ އިދާރާތަކަށް އިލްތިމާސް ކޮށްފަ އެވެ.

އެހެންކަމުން އަންނަ މަހުގެ އެއްވަނަ ދުވަހުން ފެށިގެން ސަރުކާރު މުވައްޒަފުންގެ ތެރެއިން ވެކްސިން ޖެހުމަށް ޝަރުތު ފުރިހަމަވެ ވެކްސިން ޖަހާފައި ނުވާ މުވައްޒަފުން، އެޗްޕީއޭގެ ގަވާއިދާ އެއްގޮތަށް އަމަލުކުރާކަން ސިވިލް ސާވިސްގެ އިދާރާތަކުން ކަށަވަރުކުރަމުން ގެންދިއުމަށް އެ ކޮމިޝަނުން ވަނީ އަންގާފައެވެ

އެޗްޕީއޭ އިން ވަނީ ކޮވިޑް ވެކްސިން ނުޖަހާ މީހުންނާ މެދު ތަފާތުކޮށް އަމަލުކުރަން ނިންމައި އެކަން އިއުލާނުކޮށްފަ އެވެ. އޭގެ ތެރޭގައި އާންމު ހިދުމަތްތައް ހޯދާ މީހުންނާއި އޮފީސްތަކުގައި މަސައްކަތްކުރާ މުވައްޒަފުންގެ ތެރެއިން ވެކްސިން ނުޖަހާ މީހުންނަށް ވަކި ކަންތައްތަކެއް ޝަރުތުކުރުމަށް ހުއްދަ ދިނުން ހިމެނެ އެވެ.

މި މަސް ނިމުމުގެ ކުރިން ރާއްޖޭގެ ވެކްސިން ޖެހޭ އާބާދީގެ 90 ޕަސެންޓު ވެކްސިން ފުރިހަމަ ކުރުމަކީ ސަރުކާރުގެ އަމާޒެކެވެ.