އުސޫލާއި ހިލާފަށް އުޅޭ ފަތުރުވެރިން ހޯދަން އިންސްޕެކްޝަނެއް

މީހުން ދިރިއުޅޭ ރަށްރަށުގައި އުސޫލާއި ހިލާފަށް ގިނައަދަދެއްގެ ފަތުރުވެރިން ޗުއްޓީ ހޭދަކުރަމުންދާތީ ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އިންސްޕެކްޝަނެއް ފަށައި، ފިޔަވަޅު އަޅަން ނިންމައިފިއެވެ.

އެޗްޕީއޭއިން މިއަދު ނެރުނު އިއުލާނެއްގައިވާ ގޮތުން، ރާއްޖެއަށް އަންނަ ފަތުރުވެރިންނަށް މީހުން ދިރިއުޅޭ ރަށްރަށުގައި ޗުއްޓީ ހޭދަ ކުރެވޭނެ ގޮތާ ބެހޭ ގޮތުން އަންގާފައިވާ އެންގުންތަކާ ހިލާފަށް، ގިނަ އަދަދެއްގެ ފަތުރުވެރިން ޗުއްޓީ ހޭދަ ކުރަމުންދާ ކަމުގެ މައުލޫމާތު އެ އޭޖެންސީއަށް ވަނީ ލިބިފައިވާ ކަމަށެވެ.

އެހެންކަމުން އެކަމާ ބެހޭ ގޮތުން އިތުރަށް ބަލަން ޖެހޭ ކަންތައްތައް ބަލާ، ގަވާއިދުތަކާ ހިލާފުވާ މީހުންނާ މެދު ފިޔަވަޅު އެޅުމުގެ ގޮތުން މާދަމާއިން ފެށިގެން އިންސްޕެކްޝަންތައް ކުރިއަށްގެންދާނެ ކަމަށް އެޗްޕީއޭއިން ބުނެއެވެ.

މާލެ އާއި މީހުން ދިރިއުޅޭ އެހެން ރަށްރަށުގައި އެ އިންސްޕެކްޝަންތައް ކުރިއަށް ގެންދާނީ އިމްގްރޭޝަން، ފުލުހުން، ޓުއަރިޒަމް މިނިސްޓްރީ، އިކޮނޮމިކް މިނިސްޓްރީ، ލޯކަލް ގަވަމެންޓް އޮތޯރިޓީ އަދި އެޗްޕީއޭއިން ގުޅިގެން ކަމަށް އެ އޭޖެންސީން ބުންޏެވެ.

އެޗްޕީއޭ އިން އެންމެ ފަހުން ނެރުނު އުސޫލުތަކުގައި ވަނީ ރާއްޖެއަށް އަންނަ ފަތުރުވެރިންނަށް މީހުން ދިރިއުޅޭ ރަށްރަށުގައި ޗުއްޓީ ހޭދަ ކުރެވޭނީ ވެކްސިންގެ ޑޯޒްތައް ފުރިހަމަވެ، 14 ދުވަސް ހަމަވެފައިވާ ނަމަ ކަމަށެވެ. އަދި އެގޮތަށް ވެކްސިން ފުރިހަމަނުވާ ފަތުރުވެރިންނަށް މީހުން ދިރިއުޅޭ ރަށްރަށުގެ ގެސްޓްހައުސްތަކަށް ޗެކްއިން ކުރެވޭނީ އެ ރަށެއްގެ ވެކްސިން ޖެހޭ އާބާދީގެ 60 އިންސައްތަ ވެކްސިން ފުރިހަމަކޮށްފައިވާ ނަމަ ކަމަށް އެ އުސޫލުގައިވެއެވެ.