ޗައިނާއިން ރާއްޖެ އަށް އާ ސަފީރެއް ކަނޑައަޅައިފި

ޗައިނާއިން ރާއްޖެއަށް ކަނޑައަޅާ އާ ސަފީރުކަމުގެ މަގާމަށް ވަންގް ލިޝިންގ އައްޔަންކޮށްފިއެވެ.

މިފަހަރު ޗައިނާއިން ރާއްޖެއަށް ކަނޑައެޅި ސަފީރަކީ އަންހެން ބޭފުޅެކެވެ. އައު ސަފީރު ވަންގް ލިޝިންގ ރޭ ވަނީ ރާއްޖެ ވަޑައިގެންފައެވެ.

ޗައިނާގެ އާ ސަފީރު ރާއްޖެ އަށް ރޭ ވަޑައިގެންފައި ވާއިރު، އޭނާ އަށް މަރުހަބާ ދެންނެވީ ފޮރިން މިނިސްޓްރީގެ އެޑިޝަނަލް ސެކްރެޓަރީ ޖާވިދު ފައިސަލާއި ޑެޕިއުޓީ ޗީފް އޮފް ޕްރޮޓޮކޯލް އަހުމަދު މުޖުތަބާ އެވެ.

I arrived in this beautiful country last night, overwhelmed by warmth and hospitality of Additional Secretary Mr. Javed Faizal and Deputy Chief of Protocol Mr. Ahmed Mujthaba from the Foreign Ministry.

— Ambassador Wang Lixin (@China_Amb_Mdv) August 22, 2021

ޗައިނާ ސަރުކާރުން ރާއްޖެއަށް ކަނޑައަޅާފައި ހުންނެވި ސަފީރު ޖަންގް ލީ ޖޮންގްގެ މަޤާމުގެ މުއްދަތު ހަމަވެފައިވަނީ މިދިޔަ އޭޕްރީލް މަހުގެ ތެރޭގައެވެ.

ވަންގ ވަނީ ރާއްޖެއާއި ޗައިނާގެ ގުޅުން އިތުރަށް ވަރުގަދަ ކުރުމަށް ދެ ގައުމު ގުޅިގެން މަސައްކަތް ކުރެއްވުމަށް އުއްމީދު ކުރައްވާކަމަށް ވިދާޅުވެފައެވެ.

ޗައިނާއަކީ ރާއްޖެއާ ގާތް ރަޙުމަތްތެރި ގުޅުމެއް އޮންނަ ޤައުމެކެވެ. ޗައިނާއިން ރާއްޖޭގެ އިޖްތިމާޢީ އިޤްތިޞާދީ ތަރައްޤީއަށް ވެދެއްވާފައިވާ އަދި، ވެދެއްވަމުންގެންދަވާ ދީލަތި އެހީތެރިކަން ރާއްޖެއިން އަބަދުވެސް ފާހަގަކުރެއެވެ.

ކޯވިޑްގެ ޙާލަތާ ގުޅިގެން ޗައިނާއިންވަނީ ރާއްޖޭގެ ޞިއްޙީ ދާއިރާއަށް އެހީތެރިކަން ފޯރުކޮށްދީ ރާއްޖޭގައި ގިނަ ބަޔަކަށް ކޮވިޑް ވެކްސިން ފޯރުކޮށްދީފައެވެ.