ރާއްޖެ ސަރަހައްދުން ނުރައްކާތެރި ބޯވައެއް، ސަމާލުވޭ!

ރާއްޖެއިން އާންމުކޮށް ފެންނަ ކަމަށް ފާހަގަކުރެވިފައި ނެތް ނުރައްކާތެރި ވިހަ މާއްދާއެއް ހިމެނޭ ބޯވައެއް ކަމަށްވާ "ބްލޫރިންގްޑް އޮކްޓްޕަސް" ފެންނަމުންދާތީ ސަމާލުވުމަށް މޯލްޑިވްސް މެރިން ރިސާޗް އިންސްޓިޓިއުޓް (އެމްއެމްއާރުއައި) އިން އިލްތިމާސްކޮށްފި އެވެ.

އެމްއެމްއާރުއައިން މިއަދު ބުނީ މި ފަހަކަށް އައިސް "ބްލޫރިންގްޑް އޮކްޓްޕަސް" ރާއްޖޭގެ އެކި ސަރަހައްދުން ކޮންމެވެސް މިންވަރަކަށް ފެންނަމުންދާ ކަމަށެވެ.

Spotted a tiny blue-ringed octopus and picked it up to have a closer look? We hope not! While it may look intriguing, this tiny octopus has a bite that can be fatal to humans. Please read our infograph for more info. pic.twitter.com/jOKsRCpJ6W

— Maldives Marine Research Institute (@MMRI_Maldives) August 22, 2021

މި ވައްތަރުގެ ބޯވައަކީ ރާއްޖެއިން ފެންނަ ބޯވައިގެ ބާވަތްތަކަށް ބަލާއިރު ސައިޒުން ކުޑަ ބޯވައެކެވެ. އެސޮރުމެންނަށް ނުރައްކާ އިހުސާސްވުމުން ވަށް ބޮޅުތަކެއްގެ ސިފައިގައި ގަދަ ނޫ ކުލައިގެ ވިދުމެއްހެން ލަތްތަކެއް ހަންގަނޑަށް އަރުވައެވެ.

ބްލޫރިންގްޑް އޮކްޓްޕަސް ކާނާ ހޯދުމަށް ޝިކާރަކޮށް އުޅެނީ އެ ސޮރުމެން އުފައްދާ ވިހަ މާއްދާއެއް ބޭނުންކޮށްގެންނެވެ. މިއީ ހިއްސުތަކާއި ބެހޭ ނާރުތަކަށް ހަމަލާ ދޭ ވިހަ (ނިއުރޯޓޮކްސިން) އެކެވެ. މި ބޯވަ ކާނާ ހޯދަނީ އެ ސޮރުމެންގެ ޝިކާރައިގައި ދަތްއަޅައި ޝިކާރައިގެ ހަށިގަނޑުގެ ތެރެއަށް މިވިހަ ދޫކޮށްލައި މަރާލައިގެންނެވެ. އެކި ބާވަތްތަކުގެ ނުރައްކަލުން ދިފާއުވުމަށްވެސް މި ވިހަ ދޫކޮށް އުޅެއެވެ.

މި ވިހައަކީ އިންސާނުންވެސް ވަރަށް ނުރައްކާތެރި ވިހައެކެވެ. މި ބާވަތުގެ ބޯވައިގައި އަތްލައި ހިފާ އުޅޭނަމަ އިންސާނުންގެ ގައިގައިވެސް ދަތް އަޅައި ވިހަ ދޫކުުރުމުގެ ފުރުސަތު އޮވެއެވެ. މި ގޮތަށް ބޯވަ ހިފައިގެން ގެންގުޅުމުގެ ތެރޭގައި ދަތް އެޅިނަމަވެސް އެކަމުގެ ތަދު އިހުސާސް ނުވެދާނެ އެވެ. ނަމަވެސް ހަށިގަނޑުގެ ތެރެއަށް މި ވިހަގެ އަސަރު ކޮށްފިނަމަ ކުޑަ ހިނދުކޮޅެއްގެ ތެރޭގައި ނޭވާ ހާސްވުމާއި ވާގިދިއުން ފަދަ އަލާމަތްތައް ފެންނަން ފަށައެވެ.

މިވިހައިގެ ސަބަބުން ބޯއަނބުރާ ހޮޑުލަވާގޮތްވުމާއި ހިތްހުއްޓުންފަދަ ކަންކަމުގެ އިތުރުން ނޭވާލާ ނިޒާމުގެ ވާގިދިއުންފަދަ ކަންކަން ދިމާވެގެން ވިހައިގެ އަސަރުކުރާ މީހާ މަރުވުންފަދަ ކަމެއް ދިމާވެދާނެ ކަމަށް އެމްއެމްއާރުއައި ބުންޏެވެ.

އެމްއެމްއާރުއައިން ބުނީ މިބޯވައިގެ ވިހަ ހަށިގަންޑުން ނައްތާލުމަށް އެންޓިވެނަމްއެއް އަދި ހޯދިފައި ނުވާކަމަށެވެ.