ރާއްޖޭގެ ވައިގެ ދަތުރުފަތުރު ތަރައްގީކުރުމަށް ތުރުކީއާއެކު އެއްބަަަސްވުމެއްގައި ސޮއިކޮށްފި

ރާއްޖޭގެ ވައިގެ ދަތުރުފަތުރުގެ ދާއިރާ ތަރައްގީކުރުމުގެ އެއްބސްވުމެއްގައި ތުރުކީއާއެކު ރާއްޖޭން ސޮއިކޮށްފި އެވެ.

އިއްޔެ ތުރުކީގައި އޮތް ރަސްމިއްޔާތެއްގައި މި އެއްބަސްވުމުގައި ރާއްޖޭގެ ފަރާތުން ސޮއިކުރެެއްވީ ޓްރާންސްޕޯޓު މިނިސްޓަރު އައިޝަތު ނަހުލާ އެވެ. އަދި ތުރުކީން ސޮއިކުރީ އެ ގައުމުގެ ޓްރާންސްޕޯޓު މިނިސްޓަރު އާދިލް ކަރަސްމައިލޯގެވެ.

މިނިސްޓަރު ނަހުލާ ވިދާޅުވީ މި އެއްބަސްވުމަކީ ވޭތުވެ ދިޔަ 11 ވަރަކަށް އަހަރު ތެރޭގައި ކޮށްފައިވާ މަޝްވަރާތަކަށް ފަހުވި އެއްބަސްވުމެއް ކަމަށެވެ. ތުރުކީގެ ޓްރާންސްޕޯޓު މިނިސްޓަރު އާދިލް ވިދާޅުވީ، ރާއްޖެއާއެކު ދަތުރުފަތުރުގެ ދާއިރާގެ ގިނަ މަޝްވަރާތަކެއް މިހާތަނަށް ކޮށްފައިވާ ކަމަށެވެ.

މި އެއްބަސްވުމުގެ ސަބަބުން ވައިގެ ދަތުރުފަތުރުގެ ދާއިރާ ތަރައްގީ ކުރުމުގައި ތުރުކީގެ އެހީތެރިކަން ލިބިގެންދާނެ އެވެ. އަދި ވައިގެ ދަތުރުފަތުރުގެ ދާއިރާގައި އާންމުކޮށް ދިމާވާ ގިނަ މައްސަލަތަކަށް ހައްލު ކުރުމުގައި އެހީވެ ދޭނެ އެވެ.