އުޅަނދުފަހަރުގެ އަހަރީ ފީ އާއި ޖޫރިމަނާ ބަހައިލައިގެން ދެއްކޭ ގޮތް ހަދައިފި

އެއްގަމާއި ކަނޑު އުޅަނދުފަހަރަށް ދައްކަންޖެހޭ އަހަރީފީއާއި ޖޫރިމަނާގެ ފައިސާ ބަހައިލައިގެން ދެއްކުމުގެ ގަވާއިދެއް ޓްރާންސްޕޯޓް މިނިސްޓްރީން ހަދައިފިއެވެ.

އެ މިނިސްޓަރީން މިއަދު ގެޒެޓްގައި އާއްމުކޮށްފައިވާ ގަވާއިދުގައި ބުނެފައި ވަނީ މި ގަވާއިދުގެ މަގުސަދަކީ، އެއްގަމުގައި ދުއްވާ އުޅަނދުތަކުންނާއި ކަނޑު ދަތުރުފަތުރުކުރާ އުޅަނދުފަހަރުން ކޮންމެ އަހަރަކު އެއްފަހަރު ދައްކަންޖެހޭ އަހަރީފީއާއި އަހަރީފީ ނުދެއްކުމުގެ ސަަބަބުން އަރައިފައިވާ ޖޫރިމަނާގެ ފައިސާއާއި، އަދި އެނޫންވެސް ޖޫރިމަނާގެ ތެރެއިން ދައުލަތަށް ދައްކަން ޖެހި ނުދެއްކި ހުރި ފައިސާ އެކީ އެއްފަހަރާ ދައްކަން ދަތިވާ ފަރާތްތަކަށް ލުއިފަސޭހަ ގޮތެއްގައި އެ ފައިސާ ދައުލަތަށް ދެއްކޭނެ މަގު ފަހިކޮށްދިނުން ކަމަށެވެ.

މިގޮތުން ބަހައިލައިގެން އިންސްޓޯލްމަންޓަށް ފައިސާ ދައްކަން ޖެހޭ މީހުންގެ ޝަރުތުތަކެއް ކަނޑަޅާފައި ވެއެވެ. އެއީ ދައްކަންޖެހި ނުދައްކާހުރި ފައިސާގެ އަދަދު 10،000 ރުފިޔާއަށްވުރެ އިތުރުވެފައިވާ ފަރާތްތަކަށާއި، އެ ފައިސާއަކީ ފައިސާ ދެއްކުމުގެ ސުންގަޑި ފާއިތުވެފައިވުމާއި، މި ގަވާއިދުގެ ދަށުން ފައިސާ ބަހާލައިގެން ދެއްކުމަށް ހުށަހަޅާ ފަރާރްތަކަށާއި، މީގެ ކުރިން ބަހާލައިގެން ފައިސާ ދެއްކުމުގެ ފުރުސަތު ދީފައިވާ ފަރާތަކަށް ނުވުމާއި، މިގޮތަށް އެދޭ ފަރާތަކީ އުޅަނދުގެ ވެރިފަރާތް ކަމުގައި ވުން ހިމެނެއެވެ.

ބަހާލައިގެން ފައިސާ ދެއްކުމަށް އެދި ހުށަހަޅާނީ، އެކަމަށް ކަނޑައަޅައިފައިވާ ފޯމް އެ މިނިސްޓްރީ ހުށަހަޅައިގެންނެވެ.

އަދި ބަހާލައިގެން އިންސްޓޯލްމަންޓަށް ދެއްކުމުގެ ފުރުސަތު ދެވޭނީ، ކޮމިޓްމަންޓް ފީ ދެއްކުމުން ކަމަށް އެ ގަވާއިދުގައި ވެއެވެ. އަދި ކޮމިޓްމަންޓް ފީ ދެއްކުމަށް ގިނަވެގެން ދެވޭނީ 14 ދުވަސް ކަމަށް ބުނެފައިވާއިރު، އެ މުއްދަތުގެ ތެރޭގައި ކޮމިޓްމަންޓް ފީ ދައްކައިފައި ނުވާ ނަމަ، އިތުރު އެންގުމަކާ ނުލައި، ހުށަހަޅާ ފަރާތުގެ ފޯމު ބާތިލުކުރެވޭނެ ކަމަށް ބުނެފައި ވެއެވެ.