އިންޑިއާ ކަނޑަށް ބިންހެލުމެއް އަތުވެއްޖެ

ރާއްޖޭގެ ދެކުނުން އައްޑޫ ސިޓީ އާއި 1275 ކިލޯމީޓަރު ދުރުން އިންޑިއާ ކަނޑަށް ބިންހެލުމެއް އަތުވެއްޖެ އެވެ.

މި ބިންހެލުން އައިސްފައި ވަނީ ކަނޑުގެ 10 ކިލޯމީޓަރު އަޑިއަށް 5.5 މެގްނެޓިއުޑްގެ ބާރުމިނުގައި ކަމަށް ރާއްޖޭގެ މޫސުމާއި ބެހޭ ގައުމީ އިދާރާ (މެޓް އޮފީސް) އިން ބުނެ އެވެ.

މިބިންހެލުމުގެ އެއްވެސް އަސަރެއް ރާއްޖެ އަށް ކޮށްފައި ނުވާއިރު ބިންހެލުމުގެ ސަބަބުން ސުނާމީއެއް ވެސް އުފެދިފައެއް ނުވެއެވެ.

ރޭ މެންދަމު ރާއްޖޭ ގަޑިން 01:43 ގައި އައި މިބިންހެލުން އައިސްފައިވަނީ މިޑް އިންޑިއާ ރިޖް އަށެވެ. އަދި މިބިންހެލުމުގެ ސަބަބުން އެއްވެސް ގައުމަކަށް ގެއްލުމެއް ލިބުނު ކަމުގެ ރިޕޯޓެއް މިހާތަނަށް ލިބިފައެއް ނުވެ އެވެ.