އެޗްއާރްސީއެމްގެ މެންބަރުކަމަށް ބޭފުޅަކު އައްޔަންކޮށްފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ ހުސްވެފައިވާ މެންބަރުކަމުގެ މަގާމަށް ބޭފުޅަކު އައްޔަންކޮށްފި އެވެ.

ރައީސް އޮފީހުން ބުނީ މި މަގާމަށް އައްޔަންކޮށްފައި ވަނީ ގދ. ތިނަދޫ، އަސޭގެ، ސަމާއު އަހްމަދު ނަޖީބު ކަމަށެވެ.

ސަމާއު ވަނީ މީގެ ކުރިން، 2015 ވަނަ އަހަރު ފެށިގެން އެޓާނީ ޖެނަރަލް އޮފީހުގެ ސްޓޭޓް އެޓާނީ ކަމާއި ސީނިއާ ސްޓޭޓް އެޓާނީކަން ވެސް ކުރައްވައިފަ އެވެ. އިންޑިއާގައި ހުންނަ ރާއްޖޭގެ އެމްބަސީގައި 2010 އާއި 2011 އާ ދެމެދު އެޓޭޗޭއެއްގެ މަގާމު ވެސް އޭނާ އަދާކުރެއްވި އެވެ.

ސަމާއު އަކީ އދ. ގެ ޔޫއެންސީއޭސީ އަށް ރާއްޖެއިން ކަނޑައަޅާފައިވާ މާހިރުންގެ ޓީމުގެ މެންބަރެއް ވެސް މެ އެވެ. ސަމާއު ވަނީ އޮސްޓްރޭލިއާގެ ޔުނިވާސިޓީ އޮފް މެލްބަން އިން މާސްޓާސް އޮފް ހިއުމަން ރައިޓްސް ލޯ ހާސިލުކުރައްވައިފަ އެވެ.