ކޮމިއުނިޓީ ފަންޑުގެ އެހީގައި ނޮޅިވަރަންފަރު ސްކޫލުގައި ރީޑިން ޕާކެއް

ބީއެމްއެލްގެ "އަހަރެންގެ ބޭންކް ކޮމިއުނިޓީ" ފަންޑުގެ އެހީގައި ހދ. ނޮޅިވަރަންފަރު ސްކޫލުގައި ދަރިވަރުންނަށް ރީޑިން ޕާކެއް ހުޅުވައިފި އެވެ.

މިއީ އެ ރަށުގެ ޖަމިއްޔާއެއް ކަމަށްވާ ނޮޅިވަރަންފަރު ޔޫތް ޑިވެލޮޕްމަންޓުން ތަރައްގީކުރި ޕާކެއެވެ. އެ ޖަމިއްޔާއިން ބުނީ މިއީ އެ ރަށުގެ ސްކޫލް ދަރިވަރުންނާއި ރަށުގެ ރައްޔިތުން ފޮތް ކިއުމުގެ ޝައުގުވެެރިކަން އުފައްދައި ފަސޭހަކަމާ އެކު ފޮތް ކިޔޭނެ މާހައުލެއް ގާއިމްކުރުމަށް ހިންގި ޕްރޮޖެކްޓެއް ކަމަށެވެ.

މި ޕާކުގައި ބަހައްޓާފައިވާ ފޮތް ހަރުގަނޑުތަކަކީ ހުރިހާ މޫސުމަކާ ގުޅޭ ހަރުގަނޑުތަކެކެވެ. އަދި ހުރިހާ އުމުރެއްގެ ކުދިންނަށް ހާއްސަ ފޮތްތައް ވެސް އެ ޕާކުގައި ހުންނާނެ އެވެ.

އަހަރެންގެ ބޭންކް ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކާއި ތައުލީމާއި ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހަޅާ ޕްރޮޕޯސަލްތަކެކެވެ. މި ޕްރޮޕޯސަލްތަކުގެ ތެރެއިން ކޮންމެ ކުއާޓަރެއްގައި ފަސް ޕްރޮޕޯސަލް ހޮވައި ކޮންމެ ޕްރޮޖެކްޓެއް ހިންގުމަށް 50،000ރ. ބޭންކުން ދޭނެ އެވެ.